متحدہ عرب امارات کے صدر شیخ محمد بن زاید پاکستان پہنچ گئے، اعلیٰ سطحی ملاقاتیں متوقع

اسلام آباد: متحدہ عرب امارات کے صدر شیخ محمد بن زاید النہیان سرکاری دورے پر پاکستان پہنچ گئے ہیں۔  اماراتی صدر کے خصوصی طیارے نے نور خان ایئربیس اسلام آباد پر لینڈ کیا۔

شیخ محمد بن زاید النہیان کا یہ دورہ پاکستان اور متحدہ عرب امارات کے درمیان گہرے، دیرینہ اور برادرانہ تعلقات کی ایک اور مضبوط کڑی قرار دیا جا رہا ہے،یہ دورہ دونوں ممالک کے سفارتی، سیاسی اور اقتصادی روابط کو مزید وسعت دینے کی علامت ہے۔

دورے کے دوران اماراتی صدر کی صدرِ مملکت آصف علی زرداری، وزیراعظم شہباز شریف اور دیگر اعلیٰ پاکستانی قیادت سے اہم ملاقاتیں شیڈول ہیں، جن میں دوطرفہ تعاون، علاقائی صورتحال اور عالمی امور پر تفصیلی تبادلہ خیال متوقع ہے۔

اس موقع پر وفاقی دارالحکومت اسلام آباد میں سیکیورٹی اور انتظامی انتظامات کے پیش نظر آج عام تعطیل کا اعلان بھی کیا گیا تھا۔

دفتر خارجہ کے مطابق شیخ محمد بن زاید کے ہمراہ وزرا اور سینئر حکام پر مشتمل ایک اعلیٰ سطحی وفد بھی پاکستان آیا ہے۔

دورے کے دوران باہمی دلچسپی کے امور، سرمایہ کاری، اقتصادی تعاون اور علاقائی امن سے متعلق معاملات پر بات چیت کی جائے گی۔