اب آپ ٹی وی اسکرین پر دکھائے جانیوالے کھانوں کا ذائقہ بھی چکھ سکتے ہیں، انوکھی ٹیکنالوجی ایجاد

جاپان میں ایک انوکھی اور حیران کن ایجاد سامنے آئی ہے، جس کے ذریعے اب ٹی وی دیکھنے والے ناظرین اسکرین پر دکھائے جانے والے کھانوں کا ذائقہ براہِ راست محسوس کر سکیں گے۔

یہ تجرباتی ڈیوائس "ٹیسٹ دی ٹی وی" (Taste the TV – TTTv)
کے نام سے متعارف کرائی گئی ہے، جسے میجی یونیورسٹی کے پروفیسر ہومی میاشِتا اور ان کی تحقیقی ٹیم نے تیار کیا ہے۔

بظاہر یہ ایک عام فلیٹ اسکرین ٹی وی جیسا لگتا ہے، لیکن اس میں ایک خاص نظام نصب ہے جو دس بنیادی ذائقوں جیسے میٹھا، کھٹا، نمکین، کڑوا اور دیگر کو مخصوص تناسب میں اسکرین پر منتقل کرتا ہے۔

ناظرین اس اسکرین پر زبان پھیر کر وہ ذائقہ محسوس کر سکتے ہیں جو اس وقت ٹی وی پر دکھایا جا رہا ہو۔

پروفیسر ہومی میاشِتا کے مطابق اس ٹیکنالوجی کا مقصد صرف تفریح فراہم کرنا نہیں بلکہ انسانی تجربات کو نئی جہت دینا ہے۔ انہوں نے بتایا کہ کورونا وبا کے دوران جب لوگ گھروں تک محدود تھے، تب یہ خیال آیا کہ ٹیکنالوجی کے ذریعے دنیا کے مختلف ذائقوں تک رسائی ممکن بنائی جا سکتی ہے۔

یہ نظام مستقبل میں صارفین کو گھر بیٹھے دنیا بھر کے کھانوں کا ذائقہ چکھنے کا موقع دے سکتا ہے۔ اس کا ابتدائی پروٹوٹائپ گزشتہ سال تیار کیا گیا تھا، جبکہ کمرشل ورژن کی قیمت تقریباً ایک لاکھ جاپانی ین (یعنی تقریباً 639 امریکی ڈالر) متوقع ہے۔ فی الحال یہ ڈیوائس عام صارفین کے لیے دستیاب نہیں اور مزید جانچ اور بہتری کے مراحل سے گزر رہی ہے۔

ماہرین کا کہنا ہے کہ اس ٹیکنالوجی کے استعمال کے امکانات صرف ٹی وی تک محدود نہیں رہیں گے۔ مستقبل میں اسے آن لائن ککنگ کلاسز، ریستورانوں کی ورچوئل مارکیٹنگ اور ذائقے پر مبنی فاصلاتی تعلیم کے لیے بھی استعمال کیا جا سکتا ہے۔ اس طرح یہ ایجاد نہ صرف تفریح بلکہ تعلیم اور کاروبار کے میدان میں بھی ایک نئی دنیا کے دروازے کھول سکتی ہے۔