برطانیہ میں لڑکی سے جنسی زیادتی پر 2 افغان نوجوانوں کو قید کی سزا

برطانیہ میں پناہ گزین کی حیثیت سے رہنے والے دو افغان لڑکوں پر ایک لڑکی سے جنسی زیادتی کا جرم ثابت ہونے پر عدالت نے انہیں قید کی سزا سنا دی۔

برطانیہ کی مقامی میڈیا کے مطابق جان جہانزیب نامی افغان ملزم کو 10 سال 8 ماہ جبکہ اسرار نیا زال کو 9 سال 10 ماہ قید کی سزا سنائی گئی ہے۔

رپورٹ کے مطابق لڑکی سے زیادتی کا واقعہ مئی 2025میں پیش آیا، عدالت میں  استغاثہ نے بتایا کہ 17 سالہ جان جہانزیب اور  اسرار  نیازال لیمنگٹن  کے ایک پارک  سے  15 سالہ لڑکی کو اُس وقت  زبردستی  اپنے ساتھ لے گئے  جب وہ نشے کی حالت میں تھی۔

سماعت کے دوران عدالت میں ملزمان کی جانب سے متاثرہ لڑکی کو زبردستی پارک سے لے جانے کی ویڈیو بھی چلائی گئی، عدالت میں شواہد پیش کرنے کے بعد جج نے دونوں ملزمان کو  9 اور 10 سال قید کی سزا سنائی۔ سزا مکمل ہونے کے بعد دونوں کو ملک بدر کیا جائے گا۔

رپورٹس میں بتایا گیا کہ 17 سالہ  ملزمان افغان شہری گزشتہ سال برطانیہ پہنچے تھے اور دونوں نے پناہ کی درخواست دے رکھی تھی۔