فیض حمید کتنے طاقتور تھے ؟

"فیض حمید اتنے طاقتور ہوگئے تھے کہ جنرل باجوہ کو بھی ان سے ڈر لگنے لگا تھا"

سینئر صحافی حامد میر نے دعویٰ کیا تھا کہ سابق ڈی جی آئی ایس آئی لیفٹینٹ جنرل ریٹائرڈ فیض حمید نے ملک پر 30 سال تک قبضے کا منصوبہ بنا رکھا تھا۔

گزشتہ برس نجی وی کے مارننگ شو میں گفتگو کرتے ہوئے حامد میر نے کہا تھا کہ جنرل فیض حمید صرف 3 سے 4 سال پہلے تک پاکستان کی طاقتور ترین شخصیات میں سے ایک تھے، ایک اشارہ کرتے تھے تو سیاستدان جیل میں چلا جاتا تھا، ایک اشارہ کرتے تھے تو کسی بھی ٹی وی اینکر پر پابندی لگ جاتی تھی، ایک اشارہ کرتے تھے تو ٹی وی چینلز کی ہیڈ لائنز تبدیل ہو جاتی تھیں، چلتے پروگرام بند ہو جاتے تھے۔

حامد میر کا کہنا تھا جنرل فیض جب آئی ایس آئی کے ڈی جی سی اور پھر ڈی جی آئی ایس آئی تھے تو انہوں نے صرف ایک جماعت میں اپنی جڑیں مضبوط نہیں کیں بلکہ 3، 4 جماعتوں میں اپنی جڑیں مضبوط کیں، ان کے وہ تعلقات ان کی ریٹائرمنٹ کے بعد بھی بہت کام آئے، اور موجودہ حکومت کے دور میں بھی جب ان کے خلاف ایک دو کیسز شروع ہوئے تو انہوں نے بند کروا دیے کیونکہ ان کے موجودہ حکومت میں بھی تعلقات تھے ۔

حامد میر مزید کہنا تھا کہ جب جنرل فیض حمید کے پاس طاقت اور اختیار تھا تو انہوں نے ہائیکورٹس میں ججز کو تعینات کروانے اور ان کو پروموٹ کروانے میں بہت اہم کردار ادا کیا اور ریٹائرمنٹ کے بعد ان کا عدلیہ کی کچھ شخصیات کے ساتھ رابطہ تھا۔

سینئر صحافی کا کہنا تھا جب عمران خان کے دور حکومت میں مجھ پر پابندی تھی تو میں نے واشنگٹن پوسٹ میں ایک کالم لکھا تھا جس میں میں نے یہ دعویٰ کیا تھا کہ عمران خان اور اس وقت کے ڈی جی آئی ایس آئی جنرل فیض حمید پاکستان میں پارلیمانی نظام ختم کر کے صدارتی نظام لانا چاہتے ہیں، یہ قبل از وقت انتخابات کروانا چاہتے ہیں اور فیض صاحب خود آرمی چیف بن کر نومبر یا دسمبر 2022 میں الیکشن کروانا چاہتے تھے اور اس الیکشن میں یہ تحریک انصاف کو دو تہائی اکثریت دلوانا چاہتے تھے اور ان کی کوشش تھی کہ تحریک انصاف اور پاکستان پیپلز پارٹی کا ایک الائنس بن جائے جس میں ان کو کامیابی نہیں ہو رہی تھی۔

ان کا کہنا تھا جنرل فیض صرف آرمی چیف نہیں بننا چاہ رہے تھے بلکہ انہوں نے عمران خان کو اپنی سیڑھی بنایا ہوا تھا اور وہ پاکستان میں 1973 کے آئین کو مکمل طور پر دریا برد کر کے صدارتی نظام لانا چاہتے تھے، دعوے کے ساتھ کہہ سکتا ہوں کہ جنرل فیض حمید نے میڈیا کے کچھ لوگوں سے کہا میں 30 سال تک کہیں نہیں جا رہا اس لیے آپ میرے ساتھ کھڑے ہوں ورنہ آپ کو بہت نقصان ہوگا، انہوں نے 30 سال تک ملک پر قبضے کا منصوبہ بنایا ہوا تھا وہ اس کام کے لیے عمران خان کو استعمال کر رہے تھے۔

حامد میر کے بقول جنرل ریٹائرڈ فیض حمید پیپلز پارٹی والوں کو یہ کہتے تھے کہ عمران خان کو میں 5، 10 سال بعد فارغ کر دوں گا پھر آپ کی باری ہے، پیپلز پارٹی والوں نے تو گھاٹ گھاٹ کا پانی پی رکھا ہے جب پیپلز پارٹی ان سے انگیج ہوئی تو ان کو شک پڑا یہ یہ بندہ چاہتا کیا ہے، جب پیپلز پارٹی والوں نے مزید معلومات لیں تو جنرل فیض انہیں کہتے تھے میں عمران خان سے بھی بڑا تنگ ہوں، شریف برادران سے بھی تنگ ہوں، میں نے شریف برادران کو کتنی سہولت دی اور انہیں پاکستان سے باہر بھجوایا لیکن پھر بھی باہر جاکر میرا نام لیتے ہیں، عمران خان میری مجبوری ہے، میں بلاول کو پاکستان کا وزیراعظم بنوا دوں گا لیکن آپ آصف زرداری کو کسی طرح پاکستان سے باہر بھیج دیں، پیپلز پارٹی والے کہتے تھے آصف زرداری کو کیسے بھیج دیں تو جنرل فیض کہتے تھے جس طرح نواز شریف کوبھیجا ہے۔

حامد میر کا مزید کہنا ہے کہ ان کے بڑے بڑے منصوبے تھے، وہ ہر کسی کو استعمال کرنا چاہتے تھے، خواجہ آصف صحیح کہتے ہیں کہ فیض صاحب اتنے طاقتور ہو چکے تھے کہ آخری دنوں میں تو جنرل باجوہ بھی ان سے خوف کھانے لگے تھے۔