پاکستان دنیا کے پہلے 3 کرپٹو اپنانے والے ممالک میں شامل ہوگیا

چیئرمین پاکستان ورچوئل ایسٹس ریگولیٹری اتھارٹی بلال بن ثاقب نے پریس بریفنگ میں اعلان کیا کہ پاکستان نے تاریخ میں پہلی بار عالمی کرپٹو ایکسچینجز کے لیے ایک منظم، شفاف اور عالمی معیار کا راستہ کھول دیا ہے۔ انہوں نے کہا کہ یہ اقدام ادارہ جاتی تبدیلی اور نئی سوچ کی عکاسی کرتا ہے۔

بلال بن ثاقب کے مطابق اسلام آباد نے بائنانس اور ایچ ٹی ایکس کو این او سی جاری کیا ہے، جو اس فریم ورک کے عملی آغاز کی علامت ہے۔ اس نظام کے تحت اینٹی منی لانڈرنگ اور دہشت گردی کی مالی معاونت کی مؤثر نگرانی ممکن ہوگی۔

چیئرمین نے وضاحت کی کہ پاکستان نے کوئی منفرد ماڈل نہیں بنایا بلکہ دنیا کے بڑے مالیاتی مراکز کی طرح مرحلہ وار طریقہ اپنایا ہے۔ انہوں نے کہا کہ پاکستان دنیا کے پہلے تین کرپٹو اپنانے والے ممالک میں شامل ہے اور یہ قدم عالمی مالیاتی نظام کے ساتھ ہم آہنگی کی طرف ایک اہم پیش رفت ہے۔

ان کے مطابق ملک میں پہلے ہی 3 سے 4 کروڑ افراد ڈیجیٹل اثاثے استعمال کر رہے ہیں، اس لیے بروقت اور درست فیصلے ناگزیر ہیں۔ انہوں نے مزید کہا کہ عالمی بانڈ مارکیٹ جس کی مالیت تقریباً 100 ٹریلین ڈالر ہے، تیزی سے ڈیجیٹل پلیٹ فارمز کی طرف منتقل ہو رہی ہے۔

بلال بن ثاقب نے زور دیا کہ پاکستان میں ڈیجیٹل اثاثے اپنانے کی بے پناہ صلاحیت موجود ہے، لیکن اگر یہ قانونی اور منظم راستے کے بغیر ہو تو اس کا کوئی فائدہ نہیں۔ انہوں نے کہا کہ یہ فریم ورک صرف ٹریڈنگ کے لیے نہیں بلکہ مختلف صنعتوں کے لیے بھی سودمند ثابت ہوگا۔

آخر میں انہوں نے کہا کہ اگلے دس سالوں میں پاکستان ٹیکنالوجی کے ذریعے اپنی خودمختاری کو مزید مستحکم کر لے گا۔ نوجوانوں کے لیے ان کا پیغام تھا کہ وہ مستقبل کی تیاری کریں اور ڈیجیٹل معیشت کے مواقع سے فائدہ اٹھائیں۔