PTIسے بھی وہ سلوک کیا جائے جو MQMکے ساتھ گیا تھا: کامران ٹیسوری کا مطالبہ

گورنرسندھ کامران ٹیسوری نے کہا ہے کہ پی ٹی آئی کے ساتھ وہی رویہ اختیار کیا جائے جو ایم کیو ایم کے ساتھ کیا گیا تھا۔

گورنر ہاؤس میں کامران ٹیسوری نے چیئرمین ایم کیو ایم خالد مقبول صدیقی، فاروق ستار  اور دیگر رہنماؤں کے ہمراہ پریس کانفرنس میں کہا کہ برطانیہ جیسے ملک میں ہمارے فیلڈ مارشل کے خلاف جو زبان استعمال کی گئی، یہ دہشت گردی کے زمرے میں آتی ہے۔

گورنر سندھ نے کہا کہ پی ٹی آئی بیرون ملک پاکستانیوں کو ورغلا رہی ہے، لوگ اس بیانیے سے دور رہیں، یہ بیانیہ نہیں چلے گا۔ پی ٹی آئی کا برطانیہ میں مقابلہ کرنے کے لیے بھی تیار ہیں۔  انہوں نے کہا کہ مذاکرات کے نام پر دکان کھول کر رکھی ہے۔

چیئرمین ایم کیو ایم خالد مقبول صدیقی نے کہا کہ پی ٹی آئی سے مذاکرات بھی نہیں ہونے چاہئیں۔ پی ٹی آئی کے کارکنان کو شخصیت سے نکل کر عوام کے لیے آواز بلند کرنی چاہیے۔

انہوں نے کہا کہ ہم نے لاپتہ افراد کے لیے آواز اٹھانی ہے چاہے وہ کسی بھی پارٹی کے ہوں۔ ہماری مستقل کوششوں سے خطیر رقم  لاپتہ افراد کے گھرانوں کے لئے رکھی گئی ہے، لوگوں کو لاپتہ کرنے میں ملوث افراد کو سزائیں دلوانی چاہئیں۔