ٹی-20 ورلڈ کپ 2026 کے شیڈول کا اعلان آج ہوگا

ٹی ٹوئنٹی ورلڈکپ 7 فروری سے 8 مارچ تک کھیلا جائے گا جس کیلئے شیڈول کا اعلان آج ممبئی میں کیا جائے گا، میگا ایونٹ کیلئے بھارت اور سری لنکا مشترکہ میزبان ہیں۔ بھارتی میڈیا رپورٹس کے مطابق ٹی ٹوئنٹی ورلڈکپ کی 20 ٹیموں کو 4 گروپس میں تقسیم کیا گیا ہے، گزشتہ فارمیٹ کی طرح ہرگروپ کی ٹاپ 2، 2 ٹیمیں سپر ایٹ مرحلے کیلئے کوالیفائی کریں گی، سپر ایٹ مرحلے میں 8 ٹیموں کو 2 گروپس میں تقسیم کیا جائے گا، دونوں گروپس کی ٹاپ 2، 2 ٹیمیں سیمی فائنل کے لیے کوالیفائی کریں گی۔ رپورٹس کے مطابق پاکستان اور بھارت کی ٹیمیں ایک ہی گروپ میں شامل ہیں اس گروپ میں پاکستان اور بھارت کے علاوہ امریکا، نمیبیا اور نیدر لینڈز کی ٹیمیں شامل ہیں جب کہ دونوں حریفوں کے درمیان ٹاکرا 15 فروری کو ہوگا۔ دوسری جانب سری لنکا، آسٹریلیا، زمبابوے، آئر لینڈ اور عمان ایک گروپ، انگلینڈ، ویسٹ انڈیز، بنگلا دیش ، نیپال، اٹلی ایک گروپ، ساؤتھ افریقہ ، نیوزی لینڈ ، افغانستان ، یو اے ای اور کینیڈا ایک گروپ میں شامل ہیں۔ رپورٹس کے مطابق ذرائع کا کہنا ہے کہ پاکستان اور بھارت کی ٹیمیں کولمبو میں مد مقابل ہوں گی اور پاکستان ٹیم تمام میچزسری لنکامیں کھیلے گی۔ جبکہ بھارت میں میچز کولکتہ، چنئی ، دہلی اور احمد آباد میں کھیلے جائیں گے، سری لنکا میں میچز کولمبو اور کینڈی میں ہوں گے، احمد آباد کو فائنل کیلئےمنتخب کیا گیاہے تاہم پاکستان کے پہنچنےکی صورت میں فائنل کولمبو میں ہوگا۔ دوسری جانب سیمی فائنلز کے لیے ممبئی اور کولکتہ کو چنا گیا ہے تاہم پاکستان کے پہنچنے کی صورت میں سیمی فائنل کولمبو میں ہوگا۔