شکارپور: 500روپے پر جھگڑا، سابق MNAنے 86لاکھ روپے جرمانہ لگا دیا

کراچی: سندھ کے علاقے شکارپور کے قریب سابق ایم این اے نے پانچ سو روپیوں پر شروع ہونے والے تنازع کا جرگہ کرکے 86 لاکھ روپے جرمانہ لگا دیا۔ شکارپور کے علاقے رستم میں سابق ایم این اے غوث بخش مہر نے پانچ سو روپے پر جھگڑے کا جرگہ کیا، جس میں دونوں فریقین خالق مہر اور طارق بلوچ نے دلائل دیے۔ خالق مہر نے الزام عائد کیا کہ دو سال قبل طارق بلوچ کی دکان سے ہزار روپے کا سامان خرید کیا لیکن پانچ سو ادا کرنے پر دکاندار نے بقایہ پیسوں کیلئے ہمارے ایک نوجوان کا موبائل فون اپنے پاس رکھ لیا تھا۔ خالق مہر کے مطابق کچھ روز قبل ہم دوبارہ طارق بلوچ کی دکان پر گئے تو وہاں جھگڑا ہوگیا، جس کے نتیجے میں طارق کا بھائی زخمی ہوگیا، جس پر اس نے ہمارے خلاف مقدمہ درج کروایا۔ جس کے بعد پولیس نے آپریشن کرکے ہمارے تمام گھر منہدم کردیے۔ خالق مہر نے دعویٰ کیا کہ پولیس کے آپریشن میں ہونے والے نقصان کا تخمینہ لگ بھگ 86لاکھ روپے بنتا ہے۔ دونوں فریقین کے دلائل سننے کے بعد جرگے میں دکاندار کے بھائی کو زخمی کرنے کا ایک لاکھ روپے جرمانہ عائد کیا گیا جبکہ پولیس کے ذریعے خالق مہر والوں کے گھر مسمار کرانے پر حافظ طارق بلوچ فریق پر 86 لاکھ روپے جرمانہ لگایا گیا، جبکہ ایک لاکھ روپے رعایت دی گئی اور فتوی سنایا گیا کہ طارق بلوچ جرمانہ تین قسطوں میں ادا کرے گا۔