سابق وزیراعظم بنگلادیش خالدہ ضیا وینٹی لیٹر پر منتقل

بنگلادیش کی سابق وزیراعظم خالدہ ضیا کو سانس کی شدید تکلیف اور دیگر طبی پیچیدگیوں کے باعث وینٹی لیٹر پر منتقل کر دیا گیا ہے۔ اسپتال کے میڈیکل بورڈ کے مطابق خالدہ ضیا کے نظامِ تنفس اور دیگر اعضا کو سپورٹ فراہم کرنے کے لیے یہ قدم اٹھایا گیا ہے۔

بنگلادیشی میڈیا کے مطابق 80 سالہ خالدہ ضیا 23 نومبر سے ڈھاکا کے ایورکیئر اسپتال میں زیرِ علاج ہیں۔ انہیں دل اور پھیپھڑوں میں انفیکشن کی شکایت ہے۔ ان کے دل میں مستقل پیس میکر نصب ہے اور وہ پہلے بھی اسٹنٹس لگوا چکی ہیں۔

خالدہ ضیا رواں سال مئی میں لندن سے علاج کروا کر وطن واپس آئی تھیں، جس کے بعد سے وہ اسپتال میں باقاعدہ طبی معائنوں سے گزر رہی ہیں۔ ان کے اہلِ خانہ، بشمول طارق رحمان اور زبیدہ رحمان، مسلسل ڈاکٹرز سے رابطے میں ہیں اور ان کی صحت کی تازہ ترین صورتحال سے آگاہ رہتے ہیں۔

ڈاکٹرز کا کہنا ہے کہ خالدہ ضیا کی حالت پر کڑی نظر رکھی جا رہی ہے اور انہیں مکمل طبی سہولت فراہم کی جا رہی ہے۔ ان کی صحت کے حوالے سے عوام اور سیاسی حلقوں میں تشویش پائی جاتی ہے۔