آئینی ترمیم پر اقوام متحدہ کا بیان مسترد

پاکستان نے اقوام متحدہ کے انسانی حقوق کمشنر کے بیان کو مسترد کر دیا اسلام آباد: ترجمان دفتر خارجہ نے کہا ہے کہ پاکستان نے اقوام متحدہ کے انسانی حقوق کے ہائی کمشنر کے بیانات کو بے بنیاد اور ناقابل قبول قرار دیتے ہوئے مسترد کر دیا ہے۔ ترجمان کے مطابق پاکستان کی پارلیمنٹ کی منظور کردہ 27ویں آئینی ترمیم پر اقوام متحدہ کی تشویش غیر ضروری اور ناقابل فہم ہے۔ انہوں نے کہا کہ آئینی ترامیم عوام کے منتخب نمائندوں کا اختیار ہیں اور جمہوری طریقہ کار کا احترام ہونا چاہیے۔ دفتر خارجہ نے مزید کہا کہ پاکستان انسانی حقوق، انسانی وقار، بنیادی آزادیوں اور قانون کی حکمرانی کے تحفظ کے عزم پر قائم ہے، اور افسوس ہے کہ پاکستان کا مؤقف اور زمینی حقائق اقوام متحدہ کے بیان میں شامل نہیں کیے گئے۔ ترجمان نے ہائی کمشنر سے اپیل کی کہ وہ خودمختار فیصلوں کا احترام کریں اور سیاسی تعصب یا غلط معلومات پر مبنی تبصروں سے گریز کریں۔ واضح رہے کہ اقوام متحدہ کے انسانی حقوق کمشنر نے جمعے کو کہا تھا کہ پاکستان میں جلد بازی میں منظور کی گئی آئینی ترمیم عدلیہ کی آزادی کو کمزور کر سکتی ہے۔ اُن کا کہنا تھا کہ یہ ترمیم گزشتہ سال کی 26ویں آئینی ترمیم کی طرح وکلاء برادری اور سول سوسائٹی سے مشاورت کے بغیر کی گئی ہے۔