روس کا یوکرین پر ہائپر سونک میزائل حملہ، لاکھوں گھر بجلی سے محروم

روس نے یوکرین پر ایک بڑا حملہ کرتے ہوئے فوجی اور توانائی کے ڈھانچے کو نشانہ بنایا، جس کے نتیجے میں ملک بھر میں لاکھوں گھر بجلی سے محروم ہو گئے۔

یوکرینی حکام کے مطابق ہفتے کی رات روسی افواج نے شدید حملوں کی لہر شروع کی، جس میں توانائی اور صنعتی تنصیبات کو خاص طور پر نشانہ بنایا گیا۔

یوکرین کے صدر ولادیمیر زیلنسکی نے بتایا کہ روس نے اس کارروائی میں 450 سے زائد ڈرونز اور 30 میزائل استعمال کیے۔ ان حملوں کے باعث درجنوں شہری تنصیبات کو نقصان پہنچا اور بجلی کی فراہمی بری طرح متاثر ہوئی۔

یوکرین کے وزیرِ داخلہ کے مطابق روس نے ملک کے پانچ مختلف علاقوں کو نشانہ بنایا، جس میں کم از کم پانچ افراد زخمی ہوئے۔ حکام کا کہنا ہے کہ آگ بجھانے اور بجلی بحال کرنے کا کام جاری ہے تاکہ متاثرہ علاقوں میں زندگی معمول پر لائی جا سکے۔

دوسری جانب روسی وزارتِ دفاع نے اپنے مؤقف میں کہا کہ یہ حملے یوکرین کی جانب سے روس میں شہری اہداف پر کیے گئے حملوں کے جواب میں کیے گئے۔

وزارت دفاع کے مطابق کارروائی میں یوکرین کی فوجی اور توانائی تنصیبات کو نشانہ بنایا گیا اور اس دوران کنزال ہائپر سونک میزائل سمیت جدید ہتھیار استعمال کیے گئے۔

یہ تازہ حملے یوکرین میں جاری جنگ کو مزید شدت دینے کا باعث بنے ہیں، جہاں توانائی کے بنیادی ڈھانچے پر حملے شہریوں کے لیے مشکلات بڑھا رہے ہیں اور خطے میں کشیدگی مزید گہری ہو رہی ہے۔