یورپی ممالک روس کے آگے بے بس، یوکرین کیلئے روس کے منجمند اثاثے استعمال کرنے کے بجائے مالی پیکیج کا اعلان
برسلز/کیف: یورپی یونین کے رہنماؤں نے جمعہ کے روز ایک اہم فیصلہ کرتے ہوئے یوکرین کو اگلے دو سال کے لیے 90 ارب یورو (تقریباً 106 ارب ڈالر) کی مالی مدد فراہم کرنے پر اتفاق کیا ہے، اس پیکج کا مقصد یوکرین کے دفاعی اور اقتصادی اخراجات کو پورا کرنا ہے۔
ابتدائی طور پر یورپی یونین نے غور کیا تھا کہ یوکرین کے لیے فنڈز جمع کرنے کے لیے روس کے منجمد اثاثے (تقریباً 210 ارب یورو) استعمال کیے جائیں، لیکن قانونی اور مالی خطرات کی وجہ سے یہ منصوبہ مؤخر کر دیا گیا۔
اب یہ رقم یورپی یونین کے مشترکہ بجٹ کے ذریعے قرض کی شکل میں یوکرین کو دی جائے گی جو ویاج کے بغیر دستیاب ہوگی۔
یورپی کونسل کے صدر انتونیو کوستا نے اس فیصلے کا اعلان کرتے ہوئے کہا، “ہمارے پاس ایک معاہدہ ہے۔ ہم نے فیصلہ کیا کہ یوکرین کو 90 ارب یورو کی مدد دی جائے گی۔
جرمن چانسلر فریڈرک مرز اور فرانسیسی صدر ایمانوئل میکرون نے اس اقدام کو یوکرین کے لیے ایک مضبوط اشارہ اور تعاون کی علامت قرار دیا۔
رپورٹس کے مطابق اگر مستقبل میں روس یوکرین کو جنگی معاوضے ادا کرتا ہے تو EU محفوظ طریقے سے منجمد اثاثوں کو قرض کی واپسی میں استعمال کرنے کا حق رکھے گا، لیکن فی الحال یہ اثاثے بغیر استعمال منجمد رہیں گے۔
یہ اقدام ایسے وقت سامنے آیا ہے جب یوکرین کی مالی مدد کی ضرورت بڑھ رہی ہے اور ملک کو اپنے دفاع اور عوامی خدمات کے لیے بیرونی فنڈنگ کی اشد ضرورت ہے۔