کمبوڈیا میں قید 38 پاکستانی خصوصی آپریشن کے ذریعے بازیاب

کمبوڈیا میں قید پاکستانیوں کی رہائی کے لیے خصوصی آپریشن کرکے تمام نوجوانوں کو بازیاب کرا لیا گیا۔ وزارتِ خارجہ پاکستان کے ذرائع کے مطابق کمبوڈیا میں قید پاکستانی شہریوں کی رہائی کے لیے ایک خصوصی آپریشن کیا گیا جس کے نتیجے میں 38 پاکستانی نوجوان بازیاب کرا لیے گئے۔ آزاد ہونے ہونے والے افراد لاہور، ملتان، فیصل آباد، شیخوپورہ، بہاولپور اور دیگر شہروں سے تعلق رکھتے ہیں۔ ذرائع کا کہنا ہے کہ یہ نوجوان آئی ٹی ورک ویزوں کے آن لائن اشتہارات دیکھ کر کمبوڈیا گئے تھے، جہاں مقامی گروہ نے انہیں قید کر لیا۔ قیدیوں کو کمبوڈیا کے جنگلات میں کنٹینرز میں رکھا گیا اور ان سے زبردستی آن لائن فراڈ اور ہیکنگ کے کام کروائے جاتے رہے۔ تحقیقات کے مطابق یہ گروہ دنیا بھر میں آن لائن دھوکہ دہی کے کاروبار میں ملوث تھا۔ ایک پاکستانی شہری نے ہمت دکھاتے ہوئے کمبوڈین حکومت سے آن لائن رابطہ کر کے شکایت درج کروائی، جس کے بعد کارروائی عمل میں آئی اور آپریشن کے ذریعے تمام قیدیوں کو رہا کروا لیا گیا۔ وزارتِ خارجہ کے ذرائع کے مطابق رہائی پانے والے پاکستانی ایک سے دو روز میں وطن واپس پہنچیں گے۔ حکومت پاکستان نے اس کامیاب آپریشن کو شہریوں کے تحفظ کے لیے ایک اہم قدم قرار دیا ہے اور متاثرہ خاندانوں کو جلد اپنے پیاروں سے ملنے کی خوشخبری دی ہے۔