پاکستان میں نومبر 2025میں صرف ساڑھے دس کروڑ ڈالرز غیرملکی سرمایہ کاری ہوئی: اسٹیٹ بینک
کراچی: حکومت اصلاحات اور مراعات کی یقین دہانیوں کے باوجود بیرونی سرمایہ کاروں کو راغب نہ کر سکی۔ پاکستان میں رواں برس ماہِ نومبر کے دوران صرف دس کروڑ 44 لاکھ ڈالرز کی غیرملکی سرمایہ کاری رکارڈ کی گئی۔
اسٹیٹ بینک آف پاکستان نے ماہ نومبر میں بیرونی سرمایہ کاری سے متعلق اعداد و شمار جاری کردیے۔ جس کے مطابق پاکستان میں نومبر 2025 میں 10.44 کروڑ ڈالر کی بیرونی سرمایہ کاری ہوئی، جبکہ اکتوبر 2025 میں 27.40 کروڑ ڈالر کی بیرونی سرمایہ کاری ہوئی تھی۔
اسٹیٹ بینک کے مطابق نومبر 2024 میں 19.50 کروڑ ڈالر کی بیرونی سرمایہ کاری ہوئی تھی، تاہم نومبر 2025 میں براہ راست غیرملکی سرمایہ کاری 18 کروڑ ڈالر رہی۔ اس کے علاوہ نومبر 2024 میں براہ راست غیر ملکی سرمایہ کاری 23.20 کروڑ ڈالر رہی، جبکہ نومبر2025 میں ملکی نجی شعبے میں 15.05 کروڑ ڈالر کی سرمایہ کاری ہوئی۔
اسٹیٹ بینک نے بتایا کہ نومبر2025 میں سرکاری شعبے سے 4.28 کروڑ ڈالر نکالے گئے ہیں، تاہم رواں مالی سال کے پانچ مہینوں میں 31.40 کروڑ ڈالر کی بیرونی سرمایہ کاری ہوئی۔ گذشتہ مالی سال پانچ مہینوں میں 1.39 ارب ڈالر کی بیرونی سرمایہ کاری ہوئی تھی۔