غنی امان اور سرمد کیخلاف مقدمات ختم کرنیکی درخواست مسترد

کراچی: سندھ ہائیکورٹ نے دھماکہ خیز مواد رکھنے کے الزام میں گرفتار ملزمان غنی امان چانڈیو اور سرمد میرانی کے خلاف مقدمات ختم کرنے کی درخواست مسترد کر دی۔ عدالت نے اس حوالے سے محفوظ فیصلہ سناتے ہوئے قرار دیا کہ مقدمات اپنی نوعیت کے اعتبار سے سنگین ہیں اور انسداد دہشت گردی عدالت میں ہی چلائے جائیں گے۔ درخواست گزاروں کے وکیل نے مؤقف اختیار کیا تھا کہ دونوں افراد کو پہلے لاپتہ کیا گیا۔ غنی امان چانڈیو کو اسپتال سے جبکہ سرمد میرانی کو گھر سے اٹھایا گیا۔ بعد ازاں ان کے خلاف دہشت گردی کا مقدمہ درج کر کے جوڈیشل مجسٹریٹ کے روبرو پیش کیا گیا۔ وکیل کے مطابق جوڈیشل مجسٹریٹ نے دونوں کو مقدمے سے بری کر دیا تھا، تاہم سندھ ہائیکورٹ نے اس فیصلے کو کالعدم قرار دیتے ہوئے مقدمہ انسداد دہشت گردی عدالت میں منتقل کرنے کا حکم دیا۔ درخواست گزاروں نے مزید کہا کہ عدالت نے سی ٹی ڈی کو ریمانڈ انسداد دہشت گردی عدالت میں پیش کرنے کی ہدایت دی تھی اور اس وقت دونوں ملزمان عدالتی ریمانڈ پر جیل میں ہیں۔