خالدہ ضیاء کی حالت مزید بگڑ گئی، لندن منتقل کرنے کا فیصلہ

ڈھاکا: بنگلادیش کی سابق وزیراعظم خالدہ ضیا کو بہتر علاج کے لیے لندن منتقل کرنے کا فیصلہ کرلیا گیا ہے۔

80 سالہ خالدہ ضیا کو 23 نومبر کو دل اور سینے کے انفیکشن کے باعث ڈھاکا کے ایک اسپتال میں داخل کیا گیا تھا، جہاں وہ اس وقت سی سی یو میں زیرِ علاج ہیں۔

بنگلادیشی میڈیا کے مطابق ان کے ذاتی معالج ڈاکٹر زاہد حسین نے بتایا کہ خالدہ ضیا کو کل صبح ایئر ایمبولینس کے ذریعے براستہ قطر لندن لے جایا جائے گا۔ میڈیکل بورڈ نے بھی ان کے بہتر علاج کے لیے بیرونِ ملک منتقلی کی منظوری دے دی ہے۔

خالدہ ضیا کے ساتھ ان کی جماعت کے عبوری سربراہ طارق رحمان کی اہلیہ ڈاکٹر زبیدہ رحمان بھی لندن جائیں گی، جو اس سلسلے میں کل صبح بنگلادیش پہنچیں گی۔

انعام الحق چوہدری کے مطابق خالدہ ضیا کے لندن سفر کے دوران ان کے ساتھ ایک ایڈوائزر، ان کی بہو، سات ڈاکٹر، اسپیشل فورس کے دو اہلکار اور پارٹی سربراہ کا معاون بھی ہمراہ ہوگا۔