خوشخبری! پاکستانیوں کیلئے یورپ میں روزگار کے نئے مواقع کھل گئے، ہزاروں نوکریوں کا کوٹہ مختص

پاکستانی محنت کشوں کے لیے یورپ میں روزگار کے نئے مواقع کھل گئے ہیں۔ وزارتِ سمندر پار پاکستانیز و ترقی انسانی وسائل کے ترجمان نے بتایا کہ خصوصی کوششوں کے نتیجے میں اٹلی نے پاکستان کے لیے مجموعی طور پر 10 ہزار 500 نوکریوں کا کوٹہ مختص کیا ہے، جو ایک بڑی پیش رفت ہے۔

ترجمان کے مطابق آئندہ تین برسوں میں ہر سال 3500 پاکستانی ورکرز اٹلی جا سکیں گے، جن میں 1500 سیزنل اور 2000 نان سیزنل ملازمتیں شامل ہوں گی۔

ترجمان کے مطابق یہ کوٹہ وفاقی وزیر اوورسیز پاکستانیز چوہدری سالک حسین کی درخواست پر دیا گیا ہے۔ اٹلی یورپ کا پہلا ملک ہے جس نے پاکستان کے لیے باقاعدہ کوٹہ مختص کیا ہے۔

پاکستانی ورکرز کو اٹلی میں شپ بریکنگ، ہاسپٹیلیٹی، ہیلتھ کیئر اور زراعت کے شعبوں میں مواقع فراہم کیے جائیں گے۔ جہاں پاکستانی ہنرمند اور نیم ہنرمند ورکرز خدمات انجام دیں گے۔  ان شعبوں میں ویلڈرز، ٹیکنیشنز، شیف، ویٹرز، ہاؤس کیپنگ، نرسنگ، میڈیکل ٹیکنیشنز اور فارمنگ کے لیے ملازمتیں دستیاب ہوں گی۔

وفاقی وزیر چوہدری سالک حسین نے اس اقدام کو ایک اہم سنگ میل قرار دیتے ہوئے کہا کہ طویل محنت کے بعد پاکستانی ورک فورس کے لیے یورپ کے دروازے کھل گئے ہیں۔ انہوں نے بتایا کہ پاکستان اور اٹلی کے درمیان جوائنٹ ورکنگ گروپ کا دوسرا اجلاس فروری 2026 میں اسلام آباد میں ہوگا۔

ان کا کہنا تھا کہ حکومت اپنے محنت کشوں کو عالمی سطح پر باعزت روزگار فراہم کرنے کے لیے کوشاں ہے اور اوورسیز پاکستانی ملکی معیشت کی ریڑھ کی ہڈی ہیں۔ انہوں نے امید ظاہر کی کہ جلد ہی یورپ کے مزید ممالک بھی پاکستانی ورک فورس کے لیے کھلیں گے۔