عابدہ پروین کے انتقال کی خبریں، یہ غلط فہمی کیسے پیدا ہوئی؟ بیٹی نے وجہ بتا دی

پاکستان کی معروف صوفی گلوکارہ عابدہ پروین کے انتقال سے متعلق سوشل میڈیا پر پھیلنے والی خبریں جھوٹ اور بے بنیاد ثابت ہوئیں۔ ان کی بیٹی نے وضاحت کرتے ہوئے کہا کہ والدہ بالکل خیریت سے ہیں اور صحت مند ہیں، اور ان کے انتقال کی افواہیں حقیقت سے کوئی تعلق نہیں رکھتیں۔

انہوں نے بتایا کہ لاہور کے علاقے دلگران چوک میں ایک خاتون کا انتقال ہوا تھا جن کا نام بھی عابدہ پروین تھا، اسی وجہ سے غلط فہمی پیدا ہوئی اور سوشل میڈیا پر افواہیں گردش کرنے لگیں۔

عابدہ پروین کی بیٹی نے عوام سے اپیل کی کہ وہ صرف مستند ذرائع سے معلومات حاصل کریں اور جھوٹی خبروں پر یقین نہ کریں۔

ان بے بنیاد خبروں نے ملک اور بیرونِ ملک موجود مداحوں کو شدید پریشانی میں مبتلا کر دیا۔

خاندان نے میڈیا اور عوام سے درخواست کی ہے کہ غیر مصدقہ اطلاعات پھیلانے سے گریز کریں اور فنکارہ و ان کے اہلِ خانہ کی نجی زندگی کا احترام کریں۔

واضح رہے کہ عابدہ پروین پاکستان کی عظیم صوفی گلوکاراؤں میں شمار ہوتی ہیں اور دنیا بھر میں ان کے مداح موجود ہیں۔