وزیرِ اعلیٰ KPسہیل آفریدی کو پنجاب اسمبلی میں داخلے کی اجازت مل گئی

وزیرِ اعلیٰ خیبر پختونخوا سہیل آفریدی کو پنجاب اسمبلی میں داخلے کی باضابطہ اجازت دے دی گئی ہے۔ ذرائع کے مطابق اسمبلی سیکریٹریٹ نے سہیل آفریدی اور اُن کے وفد کے داخلے کی منظوری دی۔

اس وفد میں صوبائی وزراء، کابینہ ارکان، سینیٹرز، قومی و صوبائی اسمبلی کے اراکین شامل ہوں گے۔

سہیل آفریدی اور اُن کے وفد کی مکمل فہرست اسمبلی کی سیکیورٹی کو فراہم کر دی گئی ہے۔ وزیرِ اعلیٰ خیبر پختونخوا پنجاب اسمبلی میں اپوزیشن ارکان سے ملاقات کریں گے اور ایوان سے خطاب بھی کریں گے۔

ذرائع کے مطابق سہیل آفریدی لاہور میں تین روز قیام کریں گے اور وہ موٹر وے کے راستے لاہور پہنچیں گے۔ اس دوران وہ پنجاب اسمبلی میں تحریک انصاف کے پارلیمنٹرینز سے بھی ملاقات کریں گے۔

پنجاب اسمبلی میں اپوزیشن لیڈر معین ریاض قریشی نے کہا کہ وزیرِ اعلیٰ خیبر پختونخوا آج ہمارے مہمان ہیں۔ اُنہوں نے سہیل آفریدی اور دیگر رہنماؤں کو خوش آمدید کہتے ہوئے بتایا کہ وہ پنجاب اسمبلی کے ارکان سے خطاب کریں گے۔