بھارتی خفیہ ایجنسی ’را‘ سے تعلق رکھنے والے 12 دہشتگرد ’پنجاب‘ سے دھر لیے گئے

لاہور: کاؤنٹر ٹیرر ازم ڈپارٹمنٹ (سی ٹی ڈی) پنجاب نے لاہور، فیصل آباد اور بہاولپور سے بھارت کی بدنام زمانہ خفیہ ایجنسی ’را‘ کے ساتھ تعلق کے شبہے میں 12 دہشتگردوں کو گرفتار کر لیا۔

سی ٹی ڈی کے مطابق گرفتار دہشتگردوں کے قبضے سے بھاری اسلحہ، بارودی مواد اور ڈیٹونیٹرز بھی برآمد ہوئے۔ مزید برآں، دہشتگردوں کے پاس حساس مقامات اور اداروں کی تصاویر و ویڈیوز موجود تھیں، جنہیں تحقیقاتی ٹیم نے قبضے میں لے لیا۔

ترجمان سی ٹی ڈی نے بتایا کہ لاہور سے سکھ دیپ سنگھ، عظمت، فیضان، نبیل، ابرار، عثمان اور سرفراز کو گرفتار کیا گیا، فیصل آباد سے دانش، جبکہ بہاولپور سے فتنہ الہندوستان کے رجب، ہاشم، ثاقب اور عارف کو حراست میں لیا گیا۔

سی ٹی ڈی کے مطابق گرفتار دہشتگردوں کی مدد بھارت سے آپریٹ ہونے والی فیس بک آئی ڈی ’عادل‘ نے کی، اور سکھ دیپ سنگھ پیدائشی کرسچن تھا، اس نے حال ہی میں مذہب تبدیل کیا تھا۔

سی ٹی ڈی ترجمان نے بتایا کہ یہ دہشتگرد بھارتی ایجنسی ’را‘ سے بھاری فنڈنگ بھی حاصل کر رہے تھے۔ مقدمات درج کر کے ان کے خلاف تحقیقات کا آغاز کر دیا گیا ہے۔