حکومت نے سولر صارفین کیلئے نیا بلنگ نظام متعارف کرا دیا

حکومت نے ملک بھر کے سولر صارفین کے لیے نیٹ میٹرنگ پالیسی میں بڑی تبدیلی کا فیصلہ کردیا۔

نئی پالیسی کو "نیپرا سولر صارفین قوانین 2025" کا نام دیا گیا ہے اور وزارت توانائی نے اسٹیک ہولڈرز سے مشاورت کے بعد اس کی منظوری دے دی ہے۔

نیپرا کے مطابق اب فوری نیٹ میٹرنگ کے بجائے نیٹ بلنگ کا نظام نافذ
ہوگا۔ سولر صارفین کے معاہدے کی مدت سات سال سے کم کر کے پانچ سال کر دی گئی ہے۔ نیٹ
میٹرنگ کی مد میں سولرصارفین کو اضافی سرچارج کی جگہ فی یونٹ تبادلہ ملے گا، نئی
سولر نیٹ بلنگ فی یونٹ قیمت 11 روپے کے لگ بھگ ہوگی۔

ذرائع کے مطابق پہلے نیٹ میٹرنگ کے تحت سولر صارفین کو فی یونٹ 25 روپے 98
پیسے تک کا فائدہ ملتا تھا، مگر نئی پالیسی میں یہ فرق کم ہو گیا ہے۔ مزید یہ کہ
اب 25 کلوواٹ سے کم لوڈ کے لیے بھی نیپرا سے لائسنس لینا لازمی ہوگا، جبکہ پہلے
گھریلو، صنعتی اور کمرشل صارفین کو اس حد تک استثنیٰ حاصل تھا۔

وزارت توانائی، ڈسکوز اور نیپرا نے کئی ماہ کی مشاورت کے بعد یہ
فیصلہ کیا ہے۔ ترجمان وزارت توانائی کا کہنا ہے کہ سولر ٹیرف کا تعین نیپرا
ریگولیٹرز کی ذمہ داری ہے اور صارفین کو اس تبدیلی سے زیادہ فرق محسوس نہیں ہوگا،
کیونکہ نیٹ میٹرنگ کی جگہ نیٹ بلنگ کا نظام نافذ کیا جا رہا ہے۔