راولپنڈی: باپ نے غیر کے نام پر بیٹی اور اس کے آشنا کو موت کے گھاٹ اتار دیا

راولپنڈی:تحصیل گوجرخان کے ایک علاقے میں غیرت کے نام پر دہرے قتل کا افسوسناک واقعہ پیش آیا، جہاں ایک شخص نے فائرنگ کرکے اپنی بیٹی اور اس کے آشنا کو قتل کر دیا، پولیس کے مطابق واقعہ گھریلو تنازع کے باعث پیش آیا۔

ابتدائی اطلاعات کے مطابق مقتولین کی شناخت شنائل اور رحمان اللہ کے نام سے ہوئی ہے، جبکہ فائرنگ کے دوران ملزم کی اہلیہ بھی زخمی ہو گئیں، جنہیں فوری طور پر طبی امداد کے لیے اسپتال منتقل کیا گیا۔

واقعے کی اطلاع ملتے ہی اے ایس پی گوجرخان دانیال کاظمی اور ایس ایچ او گوجرخان طیب ظہیر پولیس ٹیم کے ہمراہ جائے وقوع پر پہنچے۔  پولیس نے شواہد اکٹھے کر کے لاشوں کو اسپتال منتقل کیا اور واقعے کی باقاعدہ تحقیقات شروع کر دی ہیں۔

پولیس کا کہنا ہے کہ قانون کے مطابق کارروائی کی جا رہی ہے اور ذمہ داروں کو انصاف کے کٹہرے میں لایا جائے گا۔