کراچی میں موسم سرما کی پہلی بارش کی پیشگوئی

محکمہ موسمیات نے صوبہ سندھ کے دارالحکومت کراچی میں موسم سرما کی پہلی بارش کی پیشگوئی کر دی ہے۔ ادارے کے مطابق 28 دسمبر سے مغربی ہواؤں کا سلسلہ ملک کے بالائی علاقوں کو متاثر کرے گا اور منگل سے بدھ کے دوران یہ سسٹم مزید فعال ہو سکتا ہے۔

محکمہ موسمیات کا کہنا ہے کہ کراچی میں 30 دسمبر کو سردیوں کی پہلی بارش کا امکان ہے، جس کے بعد شہر میں سردی کی شدت میں اضافہ متوقع ہے۔
گزشتہ 24 گھنٹوں کے دوران کم سے کم درجہ حرارت 11 ڈگری سینٹی گریڈ ریکارڈ کیا گیا، جبکہ آئندہ دن میں موسم خشک اور رات کے وقت خنک رہنے کی پیشگوئی کی گئی ہے۔

محکمہ موسمیات کے مطابق آج شہر کا زیادہ سے زیادہ درجہ حرارت 26 سے 28 ڈگری کے درمیان رہنے کا امکان ہے۔ ہوا میں نمی کا تناسب 66 فیصد ہے
اور شمال مشرقی سمت سے ہلکی رفتار کی ہوائیں چل رہی ہیں۔

دوسری جانب ملک کے بالائی علاقوں میں شدید سردی کی لہر جاری ہے۔ استور میں درجہ حرارت منفی 14، اڑنگ کیل میں منفی 7، گلگت اور چترال میں منفی 4، کوئٹہ میں منفی 3، اسلام آباد اور لاہور میں 7 ڈگری جبکہ پشاور میں کم سے کم درجہ حرارت 8 ڈگری سینٹی گریڈ ریکارڈ کیا گیا ہے۔