کراچی میں بھی دھند کے باعث حد نگاہ کم، فضائی آپریشن متاثر

پنجاب کے بعد اب کراچی کے مختلف علاقوں میں بھی دھند کا راج ہے اور  صبح کے وقت شدید دھند کے باعث حدِ نگاہ انتہائی کم ہو گئی اور فضائی آپریشن متاثر ہوا۔

محکمۂ موسمیات کے مطابق سرجانی ٹاؤن، سپر ہائی وے، سہراب گوٹھ، گلستانِ جوہر، آئی آئی چندریگر روڈ، کلفٹن اور ڈیفنس کے اطراف میں دھند کا راج رہا۔

اسی طرح ایم نائن موٹروے پر بعض مقامات پر حدِ نگاہ صفر تک پہنچ گئی، جبکہ ناردرن بائی پاس، یونیورسٹی روڈ، کریم آباد اور شہر کے دیگر علاقوں میں بھی دھند ریکارڈ کی گئی۔

دھند کے باعث کراچی آنے والی 6 بین الاقوامی پروازوں کو متبادل ایئرپورٹس پر منتقل کر دیا گیا۔

ترجمان پاکستان ایوی ایشن اتھارٹی کے مطابق متعدد بین الاقوامی پروازیں کراچی کے بجائے مسقط منتقل کی گئیں، جبکہ ایک نجی ایئرلائن کی جدہ سے آنے والی پرواز کو اسلام آباد اتارا گیا، کم حدِ نگاہ میں پروازوں کی منتقلی ایک معمول کا حفاظتی اقدام ہے۔

ادھر محکمۂ موسمیات نے بتایا کہ شہر میں آج کم سے کم درجہ حرارت 17.5 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 28 سے 30 ڈگری سینٹی گریڈ کے درمیان رہنے کا امکان ہے۔ آئندہ 24 گھنٹوں کے دوران موسم زیادہ تر ابر آلود اور رات کے وقت خنک رہنے کی پیش گوئی کی گئی ہے۔