’کیا پتا سندھ پھر سے انڈیا کا حصہ بن جائے‘ راج ناتھ سنگھ کے بیان پر پاکستان برہم

بھارتی وزیرِ دفاع راج ناتھ سنگھ نے کہا ہے کہ ’آج شاید سندھ کی سرزمین انڈیا کا حصہ نہیں ہے، لیکن تہذیبی طور پر سندھ ہمیشہ انڈیا کا حصہ رہے گا۔ اور جہاں تک زمین کی بات ہے تو سرحدیں بدل سکتی ہیں۔ کیا پتا کل کو سندھ پھر سے انڈیا میں واپس آ جائے۔‘ دہلی میں ’سندھی سماج سمیلن‘ کے عنوان سے ہونے والی ایک تقریب سے خطاب کرتے ہوئے سابق نائب وزیراعظم لال کرشن اڈوانی کا ذکر کیا اور کہا کہ انھوں نے اپنی ایک کتاب میں لکھا ہے کہ ’سندھی ہندو، بالخصوص اُن کی نسل کے لوگ، آج تک سندھ کو انڈیا سے الگ کرنے کو قبول نہیں کر پائے ہیں۔‘ راج ناتھ سنگھ کا کہنا تھا کہ ’ناصرف سندھ میں بلکہ پورے انڈیا میں ہندو، سندھو ندی (دریائے سندھ) کو مقدس سمجھتے تھے۔ سندھ کے کئی مسلمان بھی مانتے تھے کہ دریائے سندھ کا پانی مکہ کے آبِ زمزم سے کسی طور کم متبرک نہیں۔ یہ اڈوانی نے کہا ہے۔‘ بھارتی وزیرِ دفاع نے مزید کہا کہ ’آج شاید سندھ کی سرزمین انڈیا کا حصہ نہ ہو، لیکن تہذیبی طور پر سندھ ہمیشہ انڈیا کا حصہ رہے گا۔ اور جہاں تک زمین کی بات ہے تو سرحدیں بدل سکتی ہیں۔ کیا پتا کل کو سندھ پھر سے بھارت میں واپس آ جائے۔‘ انھوں نے مزید کہا ’سندھ کے ہمارے لوگ جو سندھو ندی (دریائے سندھ) کو مقدس مانتے ہیں، وہ ہمیشہ ہمارے اپنے رہیں گے، وہ چاہے کہیں بھی ہوں۔‘ پاکستان نے انڈین وزیرِ دفاع کے اس بیان کی شدید مذمت کی ہے۔ ترجمان دفترِ خارجہ کی جانب سے جاری کردہ بیان میں انڈین قیادت پر زور دیا گیا کہ وہ ایسے اشتعال انگیز بیانات سے گریز کرے جو خطے کے امن اور استحکام کے لیے خطرہ بن سکتے ہیں۔ بیان میں کہا گیا کہ انڈیا کے لیے بہتر ہو گا کہ وہ اپنے ملک میں کمزور اور اقلیتی برادریوں کی سکیورٹی کو یقینی بنائے، اُن عناصر کا احتساب کرے جو اُن کے خلاف تشدد کو ہوا دیتے ہیں اور مذہبی تعصب اور تاریخی طور پر مسخ ہونے کی بنیاد پر کی جانے والی ناانصافیوں کو ختم کرے۔