بے نظیر انکم سپورٹ پروگرام کے مستحقین کیلئے خوشخبری
اسلام آباد: وفاقی حکومت نے اب بے نظیر انکم سپورٹ پروگرام کے ایک کروڑ مستحقین کو اب ڈیجیٹل والٹ کے ذریعے گھر بیٹھے ادائیگیاں کرنے کا اعلان کردیا۔
وفاقی وزیر برائے تخفیف غربت عمران احمد شاہ نے قومی اسمبلی کے اجلاس میں اعلان کیا ہے کہ بے نظیر انکم سپورٹ پروگرام کے ایک کروڑ مستحقین کو مارچ 2026 سے ڈیجیٹل والٹ کے ذریعے گھر بیٹھے ادائیگیاں کی جائیں گی۔
وفاقی وزیر عمران احمد شاہ کا کہنا تھا کہ اس اقدام سے کرپشن کا خاتمہ ہوگا اور خواتین کو قطاروں میں کھڑے ہونے کی مشکل سے نجات ملے گی۔
وفاقی وزیر نے بتایا کہ ایک کروڑ اکاؤنٹس پہلے ہی بنائے جا چکے ہیں اور جلد فون سمیں تقسیم کی جائیں گی۔ انہوں نے مزید کہا کہ پاکستان بیت المال اور بی آئی ایس پی کے درمیان 2023 میں ڈیٹا شئیرنگ کا معاہدہ ہوا تھا، جس کے تحت 40 ہزار کیسز کی جانچ پڑتال کی گئی اور 8 ہزار ڈبل اندراج والے کیسز نکال دیے گئے۔
اجلاس میں پیپلز پارٹی کی رہنما شرمیلا فاروقی نے پروگرام کے بجٹ میں اضافہ کرنے کا مطالبہ کیا، جس پر عمران احمد شاہ نے وضاحت کی کہ حکومت نے بی آئی ایس پی کے لیے 716 ارب روپے مختص کیے ہیں۔