کیا رفح گزرگاہ کھلنے جار رہی ہے؟ نیتں یاہو اور ٹرمپ کے مابین خفیہ معاہدہ؟

تل ابیب/واشنگٹن: اسرائیلی ٹی وی چینل نے باخبر ذرائع کے حوالے سے دعویٰ کیا ہے کہ اسرائیلی وزیراعظم بنیامین نیتن یاہو اور امریکی صدر ڈونلڈ ٹرمپ کے درمیان ایک اہم معاہدہ طے پا گیا ہے، جس کے تحت رفح سرحدی گزرگاہ کو فلسطینی اور مصری دونوں جانب سے دوبارہ کھول دیا جائے گا۔

رپورٹ کے مطابق یہ پیش رفت غزہ کی صورتحال اور انسانی نقل و حرکت کو بہتر بنانے کی کوششوں کا حصہ ہے۔ ذرائع کا کہنا ہے کہ معاہدے پر نیتن یاہو کے امریکی دورے کے دوران بات چیت مکمل ہوئی اور ان کی واپسی کے بعد اس پر عملدرآمد کا امکان ہے۔

چینل کے مطابق رفح بارڈر کراسنگ کی بحالی سے انسانی امداد کی ترسیل اور شہریوں کی آمد و رفت میں آسانی پیدا ہو سکتی ہے۔ تاہم اس حوالے سے اسرائیلی، امریکی یا مصری حکام کی جانب سے تاحال کوئی باضابطہ بیان سامنے نہیں آیا۔

واضح رہے کہ رفح سرحدی گزرگاہ غزہ کے لیے ایک اہم داخلی راستہ سمجھی جاتی ہے، جو گزشتہ عرصے سے کشیدگی اور سکیورٹی خدشات کے باعث بند ہے۔

مبصرین کے مطابق اگر یہ معاہدہ عملی شکل اختیار کر لیتا ہے تو خطے کی صورتحال پر اس کے نمایاں اثرات مرتب ہو سکتے ہیں۔