ایشز سیریز: انگلش ٹیم کے سکیورٹی اسٹاف اور آسٹریلوی میڈیا کے درمیان جھگڑا

برسبن: ایشز سیریز کے دوران انگلینڈ کرکٹ ٹیم کے سکیورٹی اسٹاف اور آسٹریلوی میڈیا کے درمیان تنازعہ پیدا ہو گیا۔

میڈیا رپورٹس کے مطابق  برسبین ائیرپورٹ پر ٹی وی کیمرامن کو سکیورٹی اسٹاف نے دھکے دیے جبکہ ایڈیلیڈ میں بھی کوریج کے دوران سکیورٹی اسٹاف کی مداخلت کی گئی۔

اس موقع پر کرکٹ آسٹریلیا کے حکام نے وضاحت کی ہے کہ دوران سفر ٹیموں کا خیال رکھا جائے گا اور میچز کے دوران انگلش اور آسٹریلوی ٹیمیں انٹرویو کے لیے دستیاب نہیں ہوں گی،تاہم ائیرپورٹس، ہوٹل اور ٹرانزٹ میں ایک فاصلے سے ویڈیو بنانے کی اجازت ہوگی۔

دوسری جانب ٹی وی انتظامیہ کا کہنا ہے کہ برسبین میں پبلک مقام پر ویڈیو بناتے وقت میڈیا نمائندگان کو  روکا گیا،کیوریج کا کام پیشہ وارانہ انداز میں ہو رہا تھا اور اسٹاف کی حفاظت سب سے اہم ہے، اس معاملے کو مناسب فورم پر اٹھایا جائے گا۔