کرک میں پولیس موبائل پر حملے کے بعد سیکیورٹی فورسز کی کارروائی، 8دہشتگرد ہلاک

خیبرپختونخوا کے ضلع کرک میں پولیس موبائل پر ہونے والے دہشتگرد حملے کے بعد سیکیورٹی فورسز نے بروقت کارروائی کرتے ہوئے 8 دہشتگردوں کو ہلاک کر دیا۔

پولیس کے مطابق ہلاک ہونے والوں میں انتہائی مطلوب دہشتگرد عارف عرف ڈان بھی شامل ہے۔ پولیس کا کہنا ہے کہ دہشتگردوں کے ساتھ شدید فائرنگ کا تبادلہ ہوا، جس کے دوران یہ کارروائی عمل میں لائی گئی۔

اس سے قبل دہشتگردوں کے حملے میں 5 پولیس اہلکار شہید ہوگئے تھے، جس پر پورے علاقے میں سوگ کی فضا ہے۔

شہید پولیس اہلکاروں کی نمازِ جنازہ پورے سرکاری اعزاز کے ساتھ ادا کی گئی، جس میں وزیراعلیٰ خیبرپختونخوا سہیل آفریدی، چیف سیکرٹری اور آئی جی خیبرپختونخوا ذوالفقار حمید نے شرکت کی۔

 اعلیٰ حکام نے شہداء کو خراجِ عقیدت پیش کرتے ہوئے ان کے لواحقین سے اظہارِ ہمدردی کیا۔

واقعے کے بعد علاقے میں سیکیورٹی مزید سخت کر دی گئی ہے جبکہ دہشتگردی کے خلاف کارروائیاں جاری رکھنے کے عزم کا اعادہ کیا گیا ہے۔