شکی شوہر نے بچوں کے سامنے بیوی کو زندہ جلا ڈالا، بیٹی جھلس کر زخمی

بھارتی شہر حیدرآباد میں ایک افسوسناک واقعہ پیش آیا جہاں شوہر نے شک کی بنا پر اپنی اہلیہ کو بچوں کے سامنے آگ لگا کر قتل کر دیا۔ اس واقعے میں خاتون موقع پر ہی جان سے ہاتھ دھو بیٹھی جبکہ اس کی کمسن بیٹی جھلس کر زخمی ہو گئی۔

بھارتی میڈیا کے مطابق وینکٹیش نامی شخص نے اپنی بیوی تروینی پر پیٹرول چھڑک کر آگ لگا دی۔ دونوں نے پسند کی شادی کی تھی اور ان کے دو بچے تھے۔
اہلِ خانہ کا کہنا ہے کہ شوہر کو بیوی پر شک تھا جس کی وجہ سے اکثر جھگڑے ہوتے رہتے تھے۔

رپورٹس کے مطابق تروینی شوہر کے رویے سے تنگ آکر کچھ عرصہ والدین کے گھر چلی گئی تھی، لیکن وینکٹیش اسے واپس لے آیا۔ چند دن بعد دوبارہ جھگڑا ہوا جو شدت اختیار کر گیا اور شوہر نے انتہائی قدم اٹھاتے ہوئے بیوی کو زندہ جلا دیا۔ اس دوران بیٹی نے ماں کو بچانے کی کوشش کی تو ملزم نے اسے بھی آگ کی لپیٹ میں دھکیل دیا، جس سے وہ زخمی ہو گئی۔ شور شرابہ سن کر پڑوسی موقع پر پہنچے اور ماں بیٹی کو اسپتال منتقل کیا، مگر تروینی شدید جھلسنے کے باعث جانبر نہ ہو سکی۔

پولیس کے مطابق ملزم واقعے کے بعد فرار ہو گیا تھا، تاہم 12 گھنٹے کی تلاش کے بعد اسے گرفتار کر لیا گیا۔ پولیس نے مقدمہ درج کر کے مزید تحقیقات شروع کر دی ہیں۔