بشریٰ عمران خان کو اکیلا چھوڑنے کا سوچ بھی نہیں سکتیں: مریم وٹو

بشریٰ بی بی کی بہن مریم  ریاض وٹو نے کہا ہے کہ بشریٰ اپنے شوہر عمران خان کو دھوکا دینے کے بارے میں سوچ بھی نہیں سکتیں۔

مریم وٹو نے سوشل میڈیا پلیٹ فارم ایکس پر جاری بیان میں کہا کہ تقریباً آٹھ ہفتے ہو گئے ہیں کہ خاندان کو بشریٰ عمران خان سے ملنے کی اجازت نہیں ملی۔ وکیلوں کو بھی اجازت نہیں ہے۔ ہمیں ان کے بارے میں کوئی خبر نہیں۔

انہوں نے کہا کہ اب کچھ ٹاؤٹس کے ذریعے یہ تاثر دیا جا رہا ہے کہ میں عمران خان کو کو دھوکہ دیکر اپنی بہن کو نکالنے کی کوشش کر رہی ہوں۔

بشریٰ بی بی کی بہن نے دعویٰ کیا کہ یہ ہمارے خلاف ایک اور سازش ہے۔ لوگ اتنا جھوٹ کیسے بول سکتے ہیں؟

مریم ریاض وٹو نے مزید کہا کہ بشریٰ بی بی نے خود درخواست دی تھی کہ انہیں بنی گالا سے جیل منتقل کیا جائے۔ انہوں نے پہلی بار اور دوسری بار گرفتاری کے وقت بہت بہادری سے خود کو پیش کیا۔

انہوں نے کہا کہ اگر بشریٰ بی بی کو کبھی خان صاحب کو چھوڑنا ہوتا تو وہ پہلی بار گرفتار ہونے سے پہلے ہی ایسا کر لیتیں، جب ان کے پاس موقع تھا۔ اُس وقت، جیسا کہ میں نے اپنے انٹرویوز میں بتایا تھا کہ میں نے ان سے کہا تھا کہ وہ میرے اور امی کے ساتھ رہنے آ جائیں کیونکہ خان صاحب کی گرفتاری کے بعد وہ گھر پر اکیلی تھیں۔

مریم وٹو کے بقول لیکن بشریٰ نے کہا تھا کہ اگر وہ پاکستان چھوڑ کر امی سے ملنے بھی جائیں گی تو لوگ کہیں گے کہ وہ خان کو چھوڑ کر چلی گئیں۔ انہوں نے سے کہا تھا کہ وہ کبھی خان صاحب کو نہیں چھوڑیں گی۔

مریم وٹو کا مزید کہنا تھا کہ بشریٰ بی بی اپنے شوہر کو چھوڑنے کا سوچ بھی نہیں سکتیں۔ ان شاء اللہ وہ ہمیشہ ایک ساتھ رہیں گے۔