اپوزیشن جماعتوں کا 8 فروری کو یومِ سیاہ، ملک گیر پہیہ جام اور شٹر ڈاؤن ہڑتال کا اعلان

اسلام آباد: اپوزیشن جماعتوں کے اتحاد تحریک تحفظ آئین پاکستان نے 8 فروری کو یومِ سیاہ منانے اور ملک بھر میں پہیہ جام اور شٹر ڈاؤن ہڑتال کرنے کا اعلان کر دیا۔

اپوزیشن جماعتوں کی جانب سے یہ اعلان اتوار کے روز منعقدہ دو روزہ قومی مشاورتی کانفرنس کے اختتام پر جاری مشترکہ اعلامیے میں کیا گیا۔

اعلامیے کے مطابق کانفرنس میں ملک بھر سے مختلف سیاسی جماعتوں کے نمائندوں کے علاوہ سول سوسائٹی، وکلا، صحافیوں اور سماجی طبقات نے بھرپور شرکت کی۔

تحریک تحفظ آئین پاکستان نے شفاف اور غیر جانبدار انتخابات کے انعقاد، نئے چیف الیکشن کمشنر کی تقرری، 8 فروری کے انتخابات میں مبینہ دھاندلی کی آزادانہ تحقیقات، عدلیہ کی آزادی کی بحالی اور آئین کی اصل روح کے مطابق اداروں کے درمیان توازن کے قیام کا مطالبہ کیا ہے۔

 اعلامیے میں جسٹس طارق جہانگیری سمیت باضمیر ججز کے خلاف کارروائیوں کی مذمت اور سیاسی انتقام کے خاتمے پر بھی زور دیا گیا۔

اعلامیے میں بانی تحریک انصاف عمران خان، ان کی اہلیہ، تمام سیاسی قیدیوں، بلوچ اسیران اور لاپتہ افراد کی رہائی کا مطالبہ کیا گیا ہے۔ اس کے ساتھ ساتھ انسانی حقوق کی خلاف ورزیوں، خواتین پر تشدد، میڈیا سنسرشپ، پیکا قانون اور صحافیوں کے خلاف مقدمات کو شدید تنقید کا نشانہ بنایا گیا۔

تحریک نے اعلان کیا ہے کہ 8 فروری کو ملک بھر میں احتجاج کے ذریعے ان مطالبات کو بھرپور انداز میں اجاگر کیا جائے گا۔