کراچی کی بلیاں بھی خطرناک، ایک ماہ میں 60 افراد کو کاٹ لیا

کراچی میں آوارہ کتوں کے بعد بلیاں بھی شہریوں کو دھڑادھڑ کاٹنے لگیں۔ سول ہسپتال کراچی نے بلیوں کے کاٹنے کے کیسز کے اعداد و شمار جاری کردیے۔ گذشتہ دس ماہ کے دوران صرف ایک سول ہسپتال میں بلی کے کاٹنے کے 345 کیس رپورٹ ہونے کی تصدیق کی گئی ہے۔ ہسپتال انتظامیا کا کہنا ہے کہ صرف اکتوبر کے مہینے میں 60 افراد بلیوں کے کاٹنے سے شدید زخمی ہوگئے۔ دوسری جانب ڈاکٹرز نے تنبیہہ کی ہے کہ پالتوں اور گلی محلوں میں گھومنے والی بلیوں کو ویکسین لازمی لگوائیں، ویکسین نہ لگوانے سے خطرناک بیماری ہوسکتی ہے۔ ماہرین کے مطابق بلی کے کاٹنے سے سب سے عام خطرہ انفیکشن ہے، کیونکہ بلیوں کے منہ میں موجود بیکٹیریا زخم میں داخل ہو کر بیماری پیدا کر سکتے ہیں۔ اس کے علاوہ بلی کے کاٹنے سے ریبیز، کیٹ اسکریچ ڈیزیز اور بعض اوقات شدید سوجن یا خون کی نالیوں کا انفیکشن بھی ہو سکتا ہے۔ اس لیے طبی ماہرین مشورہ دیتے ہیں کہ بلیاں بظاہر نرم و نازک لگتی ہیں، لیکن ان کے کاٹنے کے اثرات کو ہلکا نہیں لینا چاہیے، کیونکہ اگر بلی ریبیز سے متاثر ہو تو اس کے کاٹنے سے یہ مہلک وائرس انسان میں منتقل ہو سکتا ہے۔ ریبیز ایک جان لیوا بیماری ہے اور فوری ویکسینیشن ضروری ہے۔