بالی وڈ فلم دھرندھر کیخلاف درخواست، کراچی کی عدالت کا پولیس کو نوٹیس

کراچی: بھارتی فلم دھرندھر میں پیپلز پارٹی کی ریلی اور شہید بینظیر بھٹو کی تصاویر دکھانے کا معاملہ عدالت پہنچ گیا۔

سیشن عدالت جنوبی نے پیپلز پارٹی کے کارکن کی درخواست پر نوٹیسز جاری کردیے۔ عدالت کی جانب سے فلم کے رائٹر، پروڈیوسر اور اداکاروں کے خلاف مقدمہ اندراج کی درخواست پر نوٹس جاری کردیا۔

عدالت نے ایس ایچ او درخشاں کو 16 دسمبر تک رپورٹ  جمع کروانے کا حکم دے دیا۔

پاکستان پیپلز پارٹی کے جیالے عامر کھوسو نے فلم دھرندھر میں پاکستان اور پیپلز پارٹی کی ساکھ کو نقصان پنچانے پر فلم کی کاسٹ اور انتظامیہ کے خلاف مقدمہ درج کرانے کے لیے عدالت سے رجوع کیا تھا۔