موبائل فون تمباکو نوشی چھوڑنے میں مددگار ثابت، مگر کیسے؟

ایک نئی تحقیق میں یہ بات سامنے آئی ہے کہ تپ دق (ٹی بی) کے وہ مریض جو سگریٹ نوشی چھوڑ دیتے ہیں، وہ زیادہ تیزی سے صحت یاب ہو سکتے ہیں اور اس عمل میں موبائل فون کے ذریعے بھیجے جانے والے پیغامات اہم کردار ادا کرتے ہیں۔

تحقیق کے دوران مریضوں کو حوصلہ افزا اور ترغیب دینے والے ٹیکسٹ میسجز بھیجے گئے تاکہ دیکھا جا سکے کہ یہ طریقہ تمباکو نوشی ترک کرنے میں کس حد تک مددگار ثابت ہوتا ہے۔

طبی جریدے جاما میں شائع نتائج کے مطابق جن مریضوں کو زیادہ تعداد میں پیغامات ملے، وہ چھ ماہ تک تمباکو نوشی چھوڑنے میں ان افراد کے مقابلے میں زیادہ کامیاب رہے جنہیں صرف محدود معلومات فراہم کی گئی تھیں۔

تحقیق کے سربراہ نے بتایا کہ پہلے سے یہ بات ثابت ہے کہ سگریٹ نوشی ترک کرنے والے مریض تپ دق سے جلد صحت یاب ہوتے ہیں، اسی لیے ماہرین نے جانچنے کی کوشش کی کہ موبائل فون کے ذریعے بھیجے گئے پیغامات کس حد تک مؤثر ہیں۔

یہ تحقیق پاکستان اور بنگلہ دیش میں ٹی بی کے 1080 مریضوں پر کی گئی، جو موبائل فون استعمال کرتے تھے۔ ان میں سے 720 مریضوں کو پہلے دو ماہ روزانہ اور پھر چار ماہ تک ہفتہ وار پیغامات بھیجے گئے، جبکہ باقی 360 مریضوں کو صرف تحریری معلومات فراہم کی گئیں۔

نتائج کے مطابق جن مریضوں کو پیغامات موصول ہوئے، ان میں سے
41 فیصد افراد چھ ماہ تک کامیابی سے سگریٹ نوشی ترک کرنے میں کامیاب رہے۔

ماہرین کا کہنا ہے کہ موبائل فون کے ذریعے آگاہی اور حوصلہ افزائی کے پیغامات نہ صرف کم خرچ بلکہ مؤثر بھی ہیں، خاص طور پر ترقی پذیر ممالک میں۔