یورو وژن 2026میں اسرائیل کی شمولیت پر اعتراض، چار یورپی ممالک نے بائیکاٹ کردیا

آئندہ سال مئی میں آسٹریا کے شہر ویانا میں منعقد ہونے والے یورو وژن سانگ کانٹیسٹ 2026 شروع ہونے سے پہلے ہی ایک بڑے تنازع کا شکار ہو گیا۔

اسرائیل کو مقابلے میں شامل رکھنے کے فیصلے کے بعد چار یورپی ممالک اسپین، آئرلینڈ، نیدرلینڈز اور سلووینیا نے بائیکاٹ کا اعلان کر دیا۔

یوروپین براڈکاسٹنگ یونین (EBU، جو اس مقابلے کا انعقاد کرتی ہے، نے اسرائیل کے اخراج پر ووٹ کرانے سے انکار کرتے ہوئے کہا کہ زیادہ تر رکن ممالک نے اسرائیل کی شمولیت پر اعتراض نہیں کیا۔ تاہم، کئی براڈکاسٹرز نے اس فیصلے کو سیاسی غیر جانبداری کے اصولوں کے خلاف قرار دیا۔

اسپین کے سرکاری براڈکاسٹر RTVE نے کہا کہ اسرائیل کی موجودگی "یورو وژن کے غیر سیاسی ہونے کے اصول سے متصادم ہے"، جبکہ آئرلینڈ کے براڈکاسٹر RTE نے اسے "غیر اخلاقی" قرار دیا۔

نیدرلینڈز اور سلووینیا نے بھی یہی مؤقف اپنایا کہ اسرائیل کی شمولیت موجودہ حالات میں ناقابل قبول ہے، خاص طور پر غزہ میں جاری انسانی بحران کے تناظر میں۔ ان ممالک کے مطابق، یورو وژن کو موسیقی اور ثقافت کے ذریعے سیاسی تنازعات کی بجائے اتحاد کا ذریعہ ہونا چاہیے۔

ای بی یو نے اس فیصلے کے بعد اعلان کیا کہ 2026 کے مقابلے میں ووٹنگ کے قواعد مزید سخت کیے جائیں گے تاکہ شفافیت یقینی بنائی جا سکے۔ تاہم، مزید ممالک بھی بائیکاٹ پر غور کر رہے ہیں، جس سے یورو وژن 2026 بڑے تنازع کی نذر ہونے کا امکان ظاہر کیا جا رہا ہے۔

یہ تنازع یورو وژن کی تاریخ میں ایک اہم موڑ سمجھا جا رہا ہے، کیونکہ پہلی بار کئی ممالک نے اجتماعی طور پر اسرائیل کی شمولیت پر بائیکاٹ کا اعلان کیا ہے۔