بھارت میں دو غریب دوستوں نے کھیت سے کروڑوں کا ہیرا ڈھونڈ لیا

بھارت کے ضلع پنا میں دو بچپن کے دوستوں کی زندگی اس وقت بدل گئی جب کھیت میں کام کرتے ہوئے انہیں ایک قیمتی ہیرا مل گیا۔ مدھیہ پردیش کے علاقے میں 24 سالہ ستیش کھٹک اور 23 سالہ ساجد محمد معمول کے کام میں مصروف تھے کہ اچانک زمین سے 15.3 قیراط کا نایاب ہیرا برآمد ہوا۔

پنا ڈائمنڈ آفس نے اس ہیرے کی اصلیت کی تصدیق کی اور بتایا کہ اس کی قیمت تقریباً 60 لاکھ بھارتی روپے ہے، یہ رقم پاکستانی کرنسی میں ایک کروڑ 87 لاکھ پاکستانی سے زیادہ بنتی ہے۔

حکام کے مطابق یہ ہیرا جلد ہی حکومت کی نگرانی میں نیلام کیا جائے گا، اور موجودہ قوانین کے تحت حاصل ہونے والی رقم کا 88 فیصد حصہ دریافت کرنے والوں کو ملے گا جبکہ باقی حکومت کے پاس جائے گا۔

پنا میں ہر تین ماہ بعد سرکاری نگرانی میں ایسی نیلامیاں منعقد ہوتی ہیں۔ ستیش اور ساجد دونوں غریب گھرانوں سے تعلق رکھتے ہیں—ایک قصائی کا کام کرتا ہے اور دوسرا پھل فروخت کرتا ہے۔ انہوں نے میڈیا کو بتایا کہ اس دولت کو وہ اپنی زندگی بہتر بنانے کے لیے استعمال کریں گے، اور ان کی پہلی ترجیح جائیداد خریدنا نہیں بلکہ اپنی بہنوں کی شادیاں کرنا ہے۔

یاد رہے کہ ضلع پنا بھارت کا مشہور "ڈائمنڈ بیلٹ" ہے، جہاں ماضی میں بھی کئی بار قیمتی ہیروں کی دریافت ہو چکی ہے، اور یہی وجہ ہے کہ یہ علاقہ آج بھی ہیرے کی تلاش کا اہم مرکز سمجھا جاتا ہے۔