جنگلی ہاتھی کی فٹبال کھیلنے کی ویڈیو وائرل

بھارت کی ریاست اڑیسہ کے ضلع کیونجھر سے سامنے آنے والی ایک منفرد اور دلچسپ ویڈیو نے سوشل میڈیا پر دھوم مچا دی ہے، جس میں ایک جنگلی ہاتھی کو فٹبال کھیلتے دیکھا جا سکتا ہے۔

یہ غیر معمولی منظر اُس وقت ریکارڈ ہوا جب ایک مقامی گراؤنڈ میں نوجوان فٹبال کھیل رہے تھے۔ کھیل کے دوران اچانک جنگل کی جانب سے ایک ہاتھی میدان میں آنکلا اور سیدھا فٹبال کے پاس جا پہنچا اور حیرت انگیز طور پر ہاتھی نے گیند میں دلچسپی لی اور اپنی ٹانگوں سے اسے کک کرنا شروع کر دیا۔

ویڈیو میں دیکھا جا سکتا ہے کہ نوجوان کھلاڑی احتیاطاً کچھ فاصلے پر ہٹ گئے، جبکہ ہاتھی پورے سکون کے ساتھ فٹبال سے کھیلتا رہا۔ کھلاڑیوں نے اسے گراؤنڈ سے ہٹانے کی کوشش بھی کی، تاہم ہاتھی کچھ دیر تک وہیں موجود رہا اور کھیل میں مصروف نظر آیا۔

یہ دل چسپ ویڈیو سوشل میڈیا پر تیزی سے وائرل ہو رہی ہے، جہاں صارفین حیرت اور خوشی کا اظہار کر رہے ہیں،بعض افراد اسے انسان اور قدرت کے درمیان ہم آہنگی کی خوبصورت مثال قرار دے رہے ہیں، جبکہ کئی صارفین اس غیر متوقع منظر سے خوب محظوظ ہو رہے ہیں۔