نوشین شاہ نے حجاب کیوں چھوڑا؟ حیران کن وجہ

پاکستان کی معروف ماڈل و اداکارہ نوشین شاہ نے انکشاف کیا کہ انہوں نے حجاب چھوڑنے کا فیصلہ اپنی روحانی کشمکش اور دوہری زندگی کے احساس کے باعث کیا۔ نوشین شاہ نے حال ہی میں ایک پوڈکاسٹ میں شرکت کے دوران اپنی زندگی کے ایک اہم فیصلے پر کھل کر بات کی۔ اداکارہ نے پہلی بار بتایا کہ انہوں نے حجاب کیوں چھوڑا اور اس فیصلے کے پیچھے کیا وجوہات تھیں۔ نوشین شاہ کے بقول ایک خواب نے انہیں حجاب کرنے کی طرف مائل کیا۔ خواب میں انہوں نے اپنے بھائی اور والدہ کو دیکھا اور ایک آواز سنائی دی کہ اگر انہوں نے سر نہ ڈھانپا تو فرشتے ان سے دور ہو جائیں گے۔ اس خواب کے بعد انہوں نے فوراً دوپٹہ اوڑھ لیا اور تقریباً چار ماہ تک باقاعدگی سے حجاب کرتی رہیں۔ اداکارہ نے کہا کہ اس دوران وہ ہر شوٹ پر دوپٹہ ساتھ رکھتی تھیں اور گھر میں بھی حجاب کرتی رہیں۔ لیکن کچھ عرصے بعد انہیں محسوس ہوا کہ وہ دو مختلف زندگیاں گزار رہی ہیں۔ کام کے دوران وہ بالکل ماڈرن نظر آتی تھیں جبکہ گھر میں حجاب کرتی تھیں۔ یہی تضاد انہیں شدید کنفیوژن میں مبتلا کرنے لگا۔ نوشین شاہ نے بتایا کہ اس کشمکش نے انہیں سوچنے پر مجبور کیا اور بالآخر انہوں نے حجاب اتارنے کا فیصلہ کرلیا۔ انہوں نے مزید کہا کہ اگرچہ انہیں حجاب پہننا پسند تھا اور وہ اسے خوبصورتی سے اسٹائل بھی کرتی تھیں، لیکن اندرونی سکون نہ ملنے کے باعث انہوں نے اللہ سے معافی مانگی اور حجاب چھوڑ دیا۔ نوشین شاہ کے مطابق، یہ فیصلہ ان کے ذاتی روحانی سفر کا حصہ تھا اور انہوں نے اپنی زندگی میں توازن قائم کرنے کے لیے یہ قدم اٹھایا۔