اب ایف آئی اے افسران کراچی ائیرپورٹ میں چوہے بھی پکڑیں گے

اب ایف آئی اے افسران کراچی ائیرپورٹ میں چوہے بھی پکڑیں گے

کراچی ائیرپورٹ پر ایف آئی کے ایک افسر کو بطور انچارج سیوریج (بیت الخلاؤں کی صفائی) اور چوہوں کو پکڑنے کی ڈیوٹی پر نامزد کردیا گیا ہے۔ یہ افسر اس بات کا بھی پابند ہوگا کہ ہر گھنٹے کی دستخط شدہ صفائی رپورٹ ڈپٹی ڈائریکٹر کو پیش کرے۔

اس قسم کا حیرت انگیز آرڈر ڈپٹی ڈائریکٹر امیگریشن شہزاد اکبر نے جاری کیا ہے۔ جس کے مطابق ڈائریکٹر کراچی منتظر مہدی نے اسسٹنٹ سب انسپیکٹر منور مہدی کو کراچی ائیرپورٹ پر تعینات کیا، ڈپٹی ڈائریکٹر نے ایک نئے عہدے کی بنیاد رکھی اور اس کو ایڈمن انچارج بنا دیا۔

اس کے فرائض میں یہ بھی شامل ہے کہ وہ امیگریشن اور ڈپٹی ڈائریکٹر آفس میں جو چوہے "تخریب کاری" کرتے ہیں وہ کس بیت الخلاء اور کس سیوریج کی لائنوں کے ذریعے اپنا سفر کرتے ہیں اس کی بھی نشاندہی کرنا شامل ہے۔

مذکورہ آرڈر سے ایف آئی اے افسران میں سخت بے چینی اور بد دلی پھیلی ہوئی ہے اور آف لوڈنگ کے غیر مبہم زبانی احکامات اور محکمانہ کارروائیوں کے شکار ایف آئی اے افسران اس غیر پیشہ ورانہ آرڈر کو اپنی مزید تذلیل سے تعبیر کر رہے ہیں۔