سڈنی دہشتگردی: حملہ آوروں نے ٹیکٹیکل ٹریننگ آسٹریلیا میں ہی حاصل کی: نیا انکشاف

آسٹریلیا کے شہر سڈنی میں بونڈی ساحل پر ہونے والے حملے کی تحقیقات میں اہم انکشافات سامنے آئے ہیں۔

عدالتی دستاویزات کے مطابق حملے میں ملوث بھارتی نژاد شہری ساجد اکرم اور ان کے بیٹے نوید اکرم نے کارروائی سے قبل آسٹریلیا میں ہی ٹیکٹیکل ٹریننگ حاصل کی تھی۔

آسٹریلوی پولیس کی جانب سے عدالت میں جمع کرائی گئی دستاویزات میں بتایا گیا ہے کہ دونوں ملزمان نے حملے سے ایک روز قبل بونڈی بیچ کا دورہ بھی کیا تھا، جس سے واقعے کی پیشگی منصوبہ بندی کا عندیہ ملتا ہے۔ مزید انکشاف ہوا ہے کہ ایک حملہ آور کے موبائل فون سے حاصل ہونے والی ویڈیو میں باپ بیٹے کو داعش کے جھنڈے کے سامنے بیٹھے دیکھا گیا، یہ ویڈیو اکتوبر میں ریکارڈ کی گئی تھی، جس میں یہودیوں کے خلاف نفرت انگیز جذبات کا اظہار بھی کیا گیا تھا۔

میڈیا رپورٹس کے مطابق حملے میں زخمی ہونے والے نوید اکرم کو علاج کے بعد اسپتال سے جیل منتقل کر دیا گیا ہے، جبکہ ساجد اکرم کو واقعے کے وقت موقع پر ہی ہلاک کر دیا گیا تھا۔

دوسری جانب آسٹریلوی وزیراعظم انتھونی البانیز نے پارلیمنٹ سے خطاب کرتے ہوئے انتہاپسندانہ اور نفرت انگیز بیانات کے خلاف سخت قوانین متعارف کرانے کی مکمل حمایت کا مطالبہ کیا ہے۔