’ڈاکوؤں کا مکمل صفایا کریں گے‘ سندھ میں کچے کے ڈاکووں کیخلاف ایک بار پھر آپریشن کا آغاز

صوبائی وزیر داخلہ سندھ ضیا الحسن لنجار نے اعلان کیا ہے کہ کچے کے علاقوں میں آج سے بڑے پیمانے پر آپریشن کا آغاز کر دیا گیا ہے، جس کا مقصد جرائم پیشہ عناصر کا مکمل خاتمہ ہے۔

سکھر میں میڈیا سے گفتگو کرتے ہوئے انہوں نے کہا کہ کچے کے علاقوں میں موجود وہ ڈاکو جو خود کو ناقابلِ شکست سمجھتے ہیں، ان کے خلاف سخت اور فیصلہ کن کارروائی کی جائے گی۔ تاہم جو عناصر ہتھیار ڈالیں گے، انہیں قانون کے دائرے میں رہتے ہوئے رعایت دی جائے گی۔

وزیر داخلہ سندھ کا کہنا تھا کہ اس مرحلے پر فوج کی شمولیت کی ضرورت نہیں، جبکہ سندھ پولیس کے ساتھ رینجرز بھی آپریشن میں بھرپور کردار ادا کریں گی۔

انہوں نے واضح کیا کہ ضرورت پڑنے پر پنجاب پولیس کی مدد بھی حاصل کی جائے گی تاکہ آپریشن کو مؤثر اور کامیاب بنایا جا سکے۔

ضیا الحسن لنجار نے کہا کہ صوبے میں اب کسی بھی جگہ حفاظتی کانوائے نہیں چل رہے، جبکہ کچے کے علاقے میں جرائم پیشہ افراد کے خلاف بھرپور کارروائی جاری رہے گی اور ڈاکوؤں کا مکمل صفایا کیا جائے گا۔