وزیراعظم کا ایشیا کپ جیتنے والی انڈر 19 ٹیم کے ہر کھلاڑی کیلئے ایک ایک کروڑ روپے کا اعلان

اسلام آباد: وزیراعظم پاکستان شہباز شریف نے  ایشیا کپ کے فائنل میں بھارت کو بڑے مارجن سے ہرانے پر قومی انڈر 19 ٹیم کے ہر کھلاڑی کے لیے ایک ایک کروڑ روپے کا اعلان کیا۔

وزیر اعظم کی جانب سے ایشین انڈر 19چیمپئن ٹیم کے اعزاز میں استقبالیہ کیا گیا، شہبازشریف نے تمام کھلاڑیوں کا خود استقبال کیا۔ وزیراعظم نے فرداً فرداً تمام کھلاڑیوں سے مصافحہ کیا اور بھارت کے خلاف بہترین کارکردگی پر کھلاڑیوں کی حوصلہ افزائی کی۔

ذرائع کے مطابق شہباز شریف نے کہا کہ آپ لوگوں نے دنیا بھر میں پاکستان کا نام روشن کردیا، بھارت کو بدترین شکست پر میں آپ سب کو مبارکباد پیش کرتا ہوں، کل خود دیکھا ٹیم جس جوش و جذبے سے میدان میں لڑرہی تھی اس کی مثال نہیں ملتی،  مجھ سمیت تمام پاکستانیوں کو آپ پر فخر ہے۔

وزیر اعظم نے کھلاڑیوں سے کہا کہ امید کرتا ہوں کہ آپ کارکردگی کے تسلسل کو برقرار رکھیں گے، آپ بہت جلد انڈر 19 ورلڈ کپ بھی پاکستان لائیں گے، چیئرمین پی سی بی کو کہتا ہوں کہ تمام کھلاڑیوں کا بھرپور خیال رکھاجائے، تمام کھلاڑیوں کو ہر طرح کی سہولت بہم پہنچائی جائے۔

شہباز شریف نے فائنل میں 172رنز کی شاندار اننگز کھیلنے والے سمیرمنہاس کو شاباش دی اور ان کو ہیرو قرار دیا، وزیراعظم نے کہا کہ آپ میں سے بہت سے کھلاڑی کل پاکستان کی قومی ٹیم کا حصہ ہوں گے۔

اس موقع پر قومی کرکٹ ٹیم کے سابق کپتان اور پاکستان انڈر 19 ٹیم کے مینٹور سرفراز احمد نے کہا کہ  وزیراعظم نے کھلاڑیوں کے لیے ایک، ایک کروڑ روپے انعام کا اعلان کیا ہے، مستقبل میں یہ نوجوان پلیئر ملک کا نام روشن کریں گے۔