نیشنل ایکشن پلان میں پیپلزپارٹی کی شمولیت اہم ہے: آصف زرداری

پاکستان پیپلز پارٹی آج اپنا 58واں یوم تاسیس منا رہی ہے، صدرِ مملکت آصف علی زرداری نے یومِ تاسیس پر اپنے پیغام میں کہا کہ پیپلز پارٹی نے پاکستان میں جمہوریت کو مضبوط کیا اور عوام کے حقوق کی بحالی میں اہم کردار ادا کیا۔ انہوں نے کہا کہ 1973ء کے آئین کو بانی پیپلزپارٹی شہید ذوالفقار علی بھٹو کا تاریخی تحفہ قرار دیتے ہوئے کہا کہ وفاق کے استحکام اور قومی یکجہتی میں پارٹی کی شمولیت کلیدی رہی۔ صدر نے مزید کہا کہ پیپلز پارٹی نے ملک کے ایٹمی پروگرام کی بنیاد رکھی، نیشنل ایکشن پلان میں حصہ لیا اور ہمیشہ مزدور، کسان، خواتین اور اقلیتوں کی آواز رہی۔ انہوں نے کارکنان کو جمہوری اتحاد برقرار رکھنے کی ہدایت بھی دی۔ صدر آصف علی زرداری کا کہنا تھا کہ نیشنل ایکشن پلان میں پیپلزپارٹی کی شمولیت اہم ہے۔ دوسری جانب وزیراعلیٰ سندھ مراد علی شاہ نے پیپلز پارٹی کے یوم تاسیس پر عوام، جیالوں اور قیادت کو مبارکباد پیش کی اور کہا کہ پیپلز پارٹی نے ہمیشہ عوامی حقوق اور جمہوریت کے لیے جدوجہد کی ہے، ہمیشہ آمریت کا مقابلہ کر کے جمہوریت کی راہ ہموار کی۔ پیپلز پارٹی پارلیمنٹرینز کی مرکزی ترجمان شازیہ مری نے یومِ تاسیس پر کہا کہ شہید بھٹو نے ‎ہر پاکستانی کو سیاست میں حصہ لینے کا حق دیا، ‎شہید محترمہ بینظیر بھٹو نے شہید بھٹو کی تحریک کو آگے بڑھایا۔