وزیراعظم شہباز شریف نے پی ٹی آئی کو دوبارہ مذاکرات کی پیشکش کر دی

وزیراعظم شہباز شریف نے ایک بار پھر پاکستان تحریک انصاف کو مذاکرات کی پیشکش کر دی۔

وفاقی کابینہ کے اجلاس سے خطاب میں انہوں نے کہا کہ بانی پی ٹی آئی اور ان کے ساتھی بھی مذاکرات کی بات کر رہے ہیں، اور پی ٹی آئی قیادت کو پہلے بھی مذاکرات کی دعوت دی جا چکی ہے۔

 وزیراعظم نے واضح کیا کہ وہ اسمبلی کے فلور پر بھی پی ٹی آئی کو مذاکرات کی دعوت دے چکے ہیں اور اب بھی یہ پیشکش کرتے ہیں، تاہم یہ مذاکرات صرف جائز مطالبات پر ہی ہو سکتے ہیں، مذاکرات کے ذریعے بلیک میلنگ قابل قبول نہیں ہے۔

شہباز شریف نے زور دیا کہ ملک کی ترقی اور خوشحالی کے لیے سیاسی جماعتوں کے درمیان ہم آہنگی ضروری ہے اور حکومت پاکستان ہر ممکن قدم اٹھانے کے لیے تیار ہے تاکہ ملک آگے بڑھے۔