رونالڈو نے سعودیہ میں 2 لگژری ولاز خرید لیے، قیمت جان کر ہوش اڑ جائیں گے
پرتگال کے عالمی شہرت یافتہ فٹبالر اور سعودی کلب النصر کے اسٹار کھلاڑی کرسٹیانو رونالڈو نے سعودی عرب میں دو شاندار لگژری ولاز خرید لیے۔
اکتوبر 2025میں رونالڈو دنیا کے پہلے کھرب پتی فٹبالر بنے تھے، جن کی دولت کا تخمینہ تقریباً 1.4 ارب ڈالر لگایا گیا ہے، جو پاکستانی کرنسی میں 3 کھرب 93 ارب روپے سے زائد بنتا ہے۔
برطانوی میڈیا کے مطابق رونالڈو اور ان کی منگیتر جارجینا نے سعودی عرب کے مغربی ساحل پر واقع نُجوما (Nujuma) میں یہ ولاز خریدے ہیں۔ یہ علاقہ مین لینڈ سے تقریباً 26 کلومیٹر دور ہے اور وہاں تک رسائی صرف چارٹرڈ کشتی یا جہاز کے ذریعے ممکن ہے، جس کی وجہ سے یہ جگہ انتہائی پرائیویٹ اور پُرسکون سمجھی جاتی ہے۔
رپورٹ کے مطابق ایک ولا تین بیڈ رومز پر مشتمل ہے جو خاندان کے
استعمال کے لیے ہوگا، جبکہ دوسرا دو بیڈ رومز والا ولا مختصر قیام اور نجی استعمال کے لیے خریدا گیا ہے۔
ان ولاز کی ابتدائی قیمت 1 کروڑ 55 لاکھ سعودی ریال بتائی گئی ہے، تاہم مجموعی طور پر رونالڈو نے کتنی رقم ادا کی، یہ واضح نہیں ہو سکا۔
یہ ریزورٹ اپنی خاص شہرت رکھتا ہے کیونکہ یہاں صرف 19 نجی ولاز ہیں،
جو عالمی معیار کے ڈیزائن، خصوصی سہولتوں اور قدرتی ماحول کی وجہ سے ممتاز ہیں۔
ولاز خریدنے کے بعد رونالڈو نے کہا کہ جب وہ اور جارجینا پہلی بار یہاں آئے تو اس جزیرے اور اس کی قدرتی خوبصورتی سے فوراً ایک خاص تعلق محسوس ہوا۔ ان کے مطابق یہ جگہ سکون فراہم کرتی ہے اور اب یہاں اپنا گھر ہونے کی وجہ سے وہ جب چاہیں خاندان کے ساتھ معیاری وقت گزار سکتے ہیں۔
یاد رہے کہ رواں سال رونالڈو نے سعودی عرب میں ہمیشہ رہنے کی
خواہش کا بھی اظہار کیا تھا اور یہ خریداری اسی عزم کی ایک بڑی علامت سمجھی جا رہی ہے۔