امریکا کا سفری پابندیوں کی فہرست میں اضافے کا فیصلہ، اب کتنے ممالک شامل ہوں گے؟

امریکا نے سفری پابندیوں کی فہرست میں شامل ممالک کی تعداد 19 سے بڑھا کر 30 سے زائد کرنے کی تیاری شروع کر دی ہے۔

امریکی ہوم لینڈ سکیورٹی کی سیکرٹری کرسٹی نوم نے ایک امریکی ٹی وی سے گفتگو میں بتایا کہ صدر ٹرمپ یہ جائزہ لے رہے ہیں کہ مزید کن ممالک پر پابندیاں عائد کی جائیں۔ انہوں نے کسی ملک کا نام نہیں بتایا۔

اس سے قبل رواں ماہ کے آغاز میں اطلاع سامنے آئی تھی کہ ٹرمپ انتظامیہ نے قومی سلامتی اور عوامی تحفظ کے خدشات کے باعث 19 غیر یورپی ممالک سے آنے والے تارکینِ وطن کی تمام امیگریشن درخواستیں روک دی ہیں، جن میں گرین کارڈ اور امریکی شہریت کی درخواستیں بھی شامل ہیں۔

غیر ملکی خبر ایجنسی رائٹرز کے مطابق یہ پابندیاں ان 19 ممالک کے شہریوں پر لاگو ہیں جنہیں جون میں پہلے ہی جزوی سفری پابندی کا سامنا تھا،ان ممالک میں افغانستان، برما، چاڈ، جمہوریہ کانگو، استوائی گنی، اریٹیریا، ہیٹی، ایران، لیبیا، صومالیہ، سوڈان اور یمن شامل ہیں،جن پر جون میں سب سے سخت پابندیاں عائد کی گئی تھیں اور چند استثناؤں کے ساتھ امریکا میں داخلے پر مکمل پابندی بھی شامل تھی۔

جبکہ وہ ممالک جنہیں جزوی سفری پابندی کا سامنا تھا ان میں  برونڈی، کیوبا، لاؤس، سیرالیون، ٹوگو، ترکمانستان اور وینیزویلا شامل ہیں۔