بنگلادیش نے بھارتیوں کے لیے ویزوں کا اجراء بند کردیا، اصل وجہ کیا؟

بنگلادیش نے سکیورٹی خدشات کے پیشِ نظر بھارت میں اپنی سفارتی سرگرمیوں پر پابندیوں کا دائرہ مزید وسیع کر دیا ہے۔ ڈھاکا کی وزارتِ خارجہ کے مطابق بھارت میں واقع مزید تین اہم بنگلادیشی سفارتی مشنز کے ویزا سیکشنز عارضی طور پر بند کر دیے گئے ہیں، اور یہ فیصلہ جمعرات سے نافذ العمل ہو چکا ہے۔

تازہ اعلان کے تحت بھارتی شہریوں کے لیے کاروباری اور ملازمت کے ویزوں کے علاوہ تمام اقسام کے ویزے معطل کر دیے گئے ہیں۔

وزارت خارجہ نے بتایا کہ کولکتہ میں بنگلادیشی ڈپٹی ہائی کمیشن میں قونصلر اور ویزا خدمات مکمل طور پر بند کر دی گئی ہیں، جبکہ ممبئی اور چنئی میں سیاحتی ویزوں سمیت دیگر تمام ویزا سہولیات بھی عارضی طور پر معطل کر دی گئی ہیں۔

بنگلادیشی حکام کا کہنا ہے کہ جن سفارتی مشنز میں سکیورٹی سے متعلق واقعات سامنے آئے ہیں، وہاں احتیاطی تدابیر کے طور پر یہ اقدام اٹھایا گیا ہے، اور اس فیصلے کی بنیاد مکمل طور پر سکیورٹی خدشات ہیں۔

واضح رہے کہ اس سے قبل 22 دسمبر کو بھی بنگلادیش نے نئی دہلی میں واقع اپنے ہائی کمیشن، تریپورہ کے شہر اگرتلہ میں اسسٹنٹ ہائی کمیشن اور سلی گوڑی کے ویزا سینٹر میں ویزا اور قونصلر خدمات عارضی طور پر معطل کر دی تھیں۔