سندھ حکومت نے بھتہ خوری میں ملوث بیرون ملک مقیم ملزمان کی گرفتاری کیلئے وفاق سے مدد مانگ لی
کراچی شہر میں بلڈرز اور تاجروں کے خلاف بھتہ خوری کے بڑھتے واقعات کے بعد حکومت سندھ نے بیرون ملک موجود بھتہ خوروں کی گرفتاری کے لیے وفاقی حکومت کو خط لکھ دیا ہے۔
وزیراعلیٰ سندھ سید مراد علی شاہ نے کہا کہ بیرون ملک موجود ملزمان کو نہیں چھوڑا جائے گا اور اس سلسلے میں وفاقی حکومت سے تعاون طلب کیا گیا ہے۔
دوسری جانب ایس ایس پی ایس آئی یو ڈاکٹر عمران نے بتایا کہ بھتہ خوروں کے خلاف روزانہ کی بنیاد پر کارروائیاں جاری ہیں۔ اس سال اب تک 50 سے زائد بھتہ خور گرفتار کیے جا چکے ہیں جبکہ تقریبا 170 شکایات موصول ہوئی ہیں۔
انہوں نے کہا کہ جمعہ کی صبح ایک بھتہ خور مقابلے میں مارا گیا، جس کے موبائل فون سے مختلف تاجروں کے فون نمبر اور بھتہ طلب کرنے کا ڈیٹا ریکور کیا گیا۔
ڈاکٹر عمران نے مزید بتایا کہ بلڈرز کی نمائندہ تنظیم آباد نے جن 10 کیسز کا ذکر کیا تھا، ان میں سے صرف 3 مقدمات درج کیے گئے، 5 کے بارے میں کبھی اطلاع نہیں دی گئی اور 2 کیسز چند روز قبل پیش آئے جن پر کارروائی شروع کی گئی ہے۔
حکام کا کہنا ہے کہ شہر میں بھتہ خوری کے خلاف آپریشنز تیز کر دیے گئے ہیں اور قانون کے مطابق ہر ملزم کے خلاف سخت کارروائی عمل میں لائی جائے گی۔