خیبرپختونخوا، کشمیر اور بلوچستان میں بارش و برفباری، موسم مزید سرد

خیبرپختونخوا اور آزاد کشمیر کے مختلف علاقوں میں شدید بارش اور برفباری کا سلسلہ شروع ہو گیا ہے، جس کے باعث سردی کی شدت میں واضح اضافہ ہو گیا۔

پشاور، ہنگو اور چارسدہ میں بارش کے بعد موسم مزید سرد ہو گیا، جبکہ چترال، کالام، مہوڈنڈ اور مالم جبہ میں ہونے والی برفباری سے پورا علاقہ سفید چادر میں ڈھک گیا، جبکہ پہاڑی علاقوں میں سرد ہوائیں چلنے سے معمولاتِ زندگی متاثر ہونے لگے ہیں۔

ادھر آزاد کشمیر کی وادی نیلم کے زیریں علاقوں میں بارش جبکہ بالائی علاقوں میں وقفے وقفے سے برفباری جاری ہے، جس کے نتیجے میں سردی کی شدت بڑھ گئی ہے اور درجہ حرارت میں واضح کمی ریکارڈ کی گئی ہے۔

دوسری جانب بلوچستان میں بھی طویل انتظار کے بعد بارشوں کا آغاز ہو گیا ہے،گزشتہ روز بارش کے بعد صوبے بھر میں سردی کی شدت میں نمایاں اضافہ دیکھا گیا۔ چمن، قلعہ عبداللہ اور توبہ اچکزئی میں تیز ہواؤں کے ساتھ بارش کے باعث متعدد مقامات پر بجلی کے کھمبے اور دیواریں گر گئیں جبکہ درخت بھی جڑ سے اکھڑ گئے۔

محکمہ موسمیات کے مطابق آئندہ چند دنوں تک بارش اور برفباری کا یہ سلسلہ جاری رہنے کا امکان ہے، اس لیے سیاحوں اور مسافروں کو احتیاط برتنے اور غیر ضروری سفر سے گریز کرنے کی ہدایت کی گئی ہے۔